Allaskuvlla bargit servet sámi vahku doaluide
Sámi allaskuvlla bargit leat bovdejuvvon sámi vahku lágidemiide viidát. Sii servet logaldallat, juoiggastit, suokkardit goanstta jierpmi ja muđui ávvudit álbmotbeaivvi.
Harald Gaski logaldallá Munch museas Oslos 4.2 ja Bergen Assembly:s sámi álbmotbeaivve.
Munch-musea logaldatfáddá lea: "Lohkat govaid – å lese bilder. Film og samtale." Logaldaga ulbmil lea bovdet gehččiid oaidnit ja áddet mo visualitehta lea guovddáš oassin sámi govahallamis. Dasa eai gula dušše govat, muhto lea viiddit sisdoallu mii speadjalastá man láhkai min sánssat (senses) leat mielde hábmemin áddejumi, sihke lohkan, gullan ja dovdan. Nu čilge Gaski.
Lágideapmi lea oassin Munch-musea ráhkkaneames addigoahtit eanet saji sámi dáidagii.
Munch musea lágideapmi lea ovttas ISFI:in. Maŋŋil logaldaga čájehuvvojit 3 sámi oanehisfilmma, ja filbmadahkkit servet ságastallamii go filmmat leat čájehuvvon.
Bergen Assembly lea riikkaidgaskasaš dáiddadoaimmahat, mas leat juohke goalmmát jagi dáiddadáhpáhusat mat bistet golbma mánu. Juste dan vahkus goas sámi álbmotbeaivi lea, sii lágidit Cross-Course prográmma mas Gaski oassálastá oahpisteaddjin. Dasa lassin son logaldallá sámi álbmotbeaivvi fáttás "Gullat, guldalit: to hear, to listen, and act accordingly. Sámi values, views and understandings" (Gullat, guldalit ja láhttet riekta. Sámi árvvut, oainnut ja áddejumit).
-Anán dákkár bovdejumiid logaldallat hui mávssolažžan. Lea somá go eará gávpogiin ge čájehuvvo beroštupmi sámi dáidagii go dušše Romssas ja Oslos. Das gis lea buorre váikkuhus go eiseválddit oidnet ja gullet ahte eat mii leat dušše moattis geat atnit árvvus sámi dáidaga ollislaččat, muhto ahte eanebut ge háliidit oahpásmuvvat dainna.
Ofelaččat
Sámi ofelaččat ja ofelašdoaimma ráđđeaddit leat Romssas sámi álbmotbeaivve. Doppe šaddá nuoraidkafea ja dieđusge álbmotbeaivve ávvudeapmi.
Isak Saba
Mai Britt Utsi dolle Nuorta-Finnmárkui go lea bovdejuvvon logaldallat Isak Saba guovddážis Várjjagis maŋŋebárgga 4.2. dii. 18.00 rájes. Maŋŋel logaldallama bovdejuvvojit guossit ságastallamii ja gáfestallamii. Logaldallama fáddá lea Isak Saba, várjjagaš, álbmotmuittuid čoaggi- ja dutki.
Utsi lea maid lohpidan doallat Sámi álbmotbeaivvi sártni ja juoiggastit Unjárgga gieldda álbmotbeaivveávvudoaluin.
Ubmi universitehtas
Piggá Keskitalo ges lea bovdejuvvon logaldallat Ubmi universiteahtas, Venue: Galaxen Sirius. Dát lea sámi álbmotbeaivve diibmu 0900.
Lecture: Ethical Engagement in Sámi Educational Research: Building Relational Trust and Reciprocity. Setting educational issues in the Nordic and Arctic Contexts
Luonddu eallinoaidnu
Solveig Joks ges lea sámi vahku oktavuođas jerrojuvvon logaldallat lulli-Norggas. Su logaldallan lea “Naturlivssynet i samisk filosofi” -Fløtingsmuseet Fetsund ja Besøkssenter våtmark Nordre Øyeren, guovvamánu 13.beaivve.
Doalut Hamaris
Sámi lohkanguovddáža seniorráđđeaddi Elin Fjellheim searvá sámi álbmotbeaivve ávvudoaluide ja fágabeaivái Hamaris. Innlandet universitehta lágida fágabeaivvi seamma beaivve, ja Fjellheim logaldallama fáddá lea” Historien om språk-prosjektet i Elgå og hva som er viktig for å fremme sørsamisk». Ovddeš ofelaš Emma Valkeapää muitala ofelašdoaimma vásáhusaid ja mot lea leat sámi studeantan.
Oslo Kulturhistorjjálaš musea vuosttašamanueansa Jostein Bergstøl fállá logaldallamis oasážiid lullisámi historjjás ovdal go šaddá panelaságastallan fáttás mot galgá váldit vára lullisámi kulturárbbi.
Lágideami sáhttá čuovvut zooma bokte:
https://inn.zoom.us/j/64233260255?pwd=U2Ht4DuqH0MqSZhJy1PKAYNN3LF7S3.1
Meeting ID: 642 3326 0255 Passcode: 695017
Sámi AI Lab
Sámi AI Lab maiddái searvá sámi vahku lágidemiide. Sii dollet bargobájiid ja ságastallamiid guovvamánu 4. ja 5. beaivvi Gáisi Romssas. Sii bovdejit nuoraid AI- ja sámi muitalanbargobádjái Tvibitas. Dás beassá oahppat mot geavahit AI sámi muitalusaid habmet govaid, filmmaid ja spealuid. Sámi allaskuvlla AI-prošeakta ja Tvibita Kreativ Teknologi jođihit bargobáji, veahkkin leat čeahpes sámi muitaleaddjit. Dát lea guovvamánu 5. Beaivvi dii 1630-1900.
4.beaivve lea debáhtta AI birra, gaskal dii 18.00-20.00 masa Sámi allaskuvlla prorektor Samuel Valkeapää searvá.
Govva: AI ráhkaduvvon govva sápmelaš Romssas.
