JUR-2002 Sámi kultuvrra riektesuodjalus
- Oahpu lágideapmi: 2 fysalaš deaivvadeami Diehtosiiddas, ja muđui neahttaoahpahus.
- Oahppokoda: JUR-2002
- 10 oahppočuoggá
Oahppoplána- Lohkanmearri
- Diibmoplána ja deaivvadanplána: TimeEdit
- FUOM! Ovdal beasat dán ohppui álgit, fertet čađahan ja ceavzán JUR 101 Sámeriekti oahpu, mii maiddái čađahuvvo 2025 čavčča. Jus it leat ovdal čađahan dán oahpu dahje vástideaddji oahpu, de ávžžuhit maiddái JUR 101 Sámeriekti ohppui ohcat.
Oahpu sisdoallu
Sámi álbmot lea unnitčeardda- ja eamiálbmot, ja danin lea sámi kultuvrras sierra riektesuodjalus nationála lágaid ja riikkaidgaskasaš soahpamušaid bokte. Riektesuodjalus sihkkarastá ahte sámit besset eallit ja seailluhit sámi kultuvrra, ja stádas lea geatnegasvuohta sihkkarastit sámi kultuvrra riektesuodjalusa iešguđet eiseválddiid hálddašanválddi bokte.
Dát oahppu hukse JUR 101 Sámeriekti oahpu ala, gos studeanttat leat háhkan vuođđogelbbolašvuođa sáme- ja eamiálbmotrivttiin. Dán oahpus čiekŋudit studeanttat sámi kultuvrra riektesuodjalussii, ja ohppet dárkileabbo riektesuodjalusa mearkkašumi birra kulturdoaimmaheamis. Dákkár kulturdoaimmat sáhttet leat sámegielgeavaheapmi, sámi oahpahus, duodji ja dáidda, ja meahcásteapmi ja bivdu. Studeanttat ohppet maiddái mo sámiid iežaset riekteáddejupmi ja iešmearrideapmi dahká vuođu stáda geatnegasvuođaide sámi kultuvrra riektesuodjalusa hárrái.
Oahppu lea hábmejuvvon studeanttaide geain ii leat riektedieđametoda gelbbolašvuohta, muhto addá studeanttaide gelbbolašvuođa iežaset fágaárbevieruid metodalaš geahčastagas kritihkalaččat suokkardallat sámi kultuvrra riektesuodjalusa dihto fáttáid siskkobealde.
Oahpu gullevašvuohta
Oahppu lea doarjjafágan duodji ja hábmema bacheloras ja sámegiela ja sámi girjjálašvuođa bacheloras. Sáhttá dohkkehuvvot doarjjafágan maiddái eará bacheloroahpuin
Oahpahusgiella
Oahpahus- ja eksámengiella lea davvisámegiella. Lohkanmearri lea sámegillii, dárogillii ja eŋgelasgillii.
Oahpahan - ja oahppanvuogit
Logaldallamat, joavkoságastallamat ja proseassačállin. Vurdojuvvo ahte studeanttat oassálastet aktiivvalaččat buotlágan oahpahusvugiide ja lohket lohkanmeari áŋgirit. Studeantabarggut galget dábálaččat ovdanbuktot plenumas.
Ovdal beassá eksámenii, studeanta galgá:
- Leat oassálastán unnimus 80 % fysalaš deaivvademiin Diehtosiiddas
- Čađahan ja ožžon dohkkehuvvot ovtta oktagaslaš 4−5 siidosaš čálalaš bargobihtá
- Ovdanbuktit barggu njálmmálaččat bagadallansemináras
Eksámen
Eksámen lea 5-beaivásaš ruovttueksámen mas studeanta čállá 5-7 siidosaš čállosa. Ovdasiidu ja gáldočujuhusat bohtet lassin siidomearrái.
Árvosánit addojuvvojit ECTS vuogádaga mielde, mas A lea buoremus árvosátni ja E lea vuolemus ceavzinárvosátni. F-árvosátni mearkkaša ahte ii leat ceavzán