Hanna-Máret Outakoski virgáduvvon professorin Sámi allaskuvlii

Sámi allaskuvla lea virgádan Hanna-Máret Outakoski professorin sámegielas ja sámegiela didaktihkas. Sus lea doavttergráda gielladiehtagis mas lea sámegillii čiekŋudeapmi.

Sámi allaskuvlla goahtejođiheaddji John-Marcus Kuhmunen lea hui rámis go Outakoski lea háliidan Sámi allaskuvlii.

- Sus lea guhkes ja nanu akademalaš duogáš ja danin lea su virgádeapmi hirbmat mávssolaš Sámi allaskuvlla fágabirrasii. Professorin son galgá váldit njunuš rolla fágabirrasis ja fágalaččat ovddidit ja jođihit sámegiela ja sámegiela didaktihka fágasuorggi oahpaheaddjeoahpuin. Mis lea dál stuorra giellafágabiras mas lea gelbbolašvuohta sámegielas, sámegiela didaktihkas, sámegiela girjjálašvuođas, ja riikkagielain mat leat suomagiella, ruoŧagiella ja dárogiella. Mii illudit maid ahte sáhttit ovddosguvlui áŋgiruššat ja nannet min dutkan- ja ovdánahttinbargguid sámegiela lohkamis, čállimis ja njálmmálaš gielas ja muđui maiddái nannet sámegiela geavahusa ja sajádaga mánáidgárddis ja skuvllas. Lea stuorra lávki ovddosguvlui go Outakoski searvá allaskuvlii, dadjá Kuhmunen.

Giella ja oahpahusdiehtaga fágabirrasa nanusmáhttin

Hanna-Máret Outakoski lea eret Vuovdaguoikkas, Ohcejoga gielddas, ja son lea čađahan dutkamuša gielladiehtaga ja oahpahusdiehtaga surggiin Ubmis, Ruoŧas. Sus lea guhkes akademalaš vásáhus oahpaheaddjin ja dutkin sihke UiT Norgga Árktalaš universitehtas ja Ubmi universitehtas.

- Mun illudan ođđa bargguide Sámi allaskuvllas, gos beasan leat mielde ovdánahttime sámegiela ja sámi oahpaheaddjeoahpuid, dadjá Hanna Outakoski. Son lea álgán bargui Sámi allaskuvlii ođđajagimánu 1. beaivvi 2025.