SÁM 318 Sámi sosiolingvistihka perspektiivvat ja lahkonanvuogit

• Oahpu lágideapmi: Neahttaoahpahus
• Oahpahusgiella: Davvisámegiella lea váldo oahpahus- ja eksámengiella. Eará sámegielat ja suoma-, ruoŧa-, dáro- ja eaŋgalsgiella sáhttet adnojuvvot omd. guosselogaldallamiin.
• Oahpu koda: SÁM 318
• Dássi: Master
• Viidodat: 10 oahppočuoggá
• Liŋka: Diibmoplána

Háliidatgo oahpásmuvvat sosiolingvistihkkii – suorgái mii guorahallá giela servodatlaš sajádaga ja olbmo ja giela gaskavuođaid? Dát lea oahppu mii galgá láidestit studeantta sosiolingvisttalaš dutkamuššii. Dat lágiduvvo dán háve neahttaoahpahussan, moadde vahku áiggi hui intensiivvalaš áigetávvalis. Oahppu vuodju sámi sosiolingvistihka dáfus áigeguovdilis fáttáide, dego giellapolitihkka, giellaideologiijat, ođđa hálliid albmoneapmi ja nuoraid giellageavaheapmi. Oahpu váldodeaddu lea dutkama perspektiivvain ja metodain, ja dat čalmmustahttojuvvojit ovdamearkkaid bokte.

Oahpu bargogáibádusaide gullet guokte unnimustá 4-siidosaš čállosa, mat ovdanbuktojuvvojit ja ságastallojuvvojit bargoseminárain. Dat čállosat ja guovtte vahku ruovttueksámena čálus gullet oktii ja huksejit ollesvuođa. Studeanta vállje ieš oahpu álggus dakkár fáttá sámi sosiolingvistihka giettis, masa háliida vuodjut ja man birra čállit. Fáttá birra lea vejolaš gulahallat fágakoordináhtoriin juo ovdalgihtii.  

Oahpu čađaheapmi eaktuda studeanttas doarvái áiggi ja návccaid. 36 deaivvadandiimmu lassin studeanta ferte vuodjut lohkanmearrái, čállit guokte čállosa ja vejolaččat čađahit smávva bargobihtáid deaivvademiid gaskkas. Studeanta ferte searvat unnimustá 80 %:ii oahpahusas. Neahttaoahpahus eaktuda dan, ahte studeanttas leat sajis teknihkalaš rustegat dego mikrofovdna ja kámera.

SÁM 318 heive studeanttaide geat leat beroštuvvan sosiolingvistihkas ja háliidit áddet buorebut sámegielaid ja máilmmi gielaid diliid ja dan, mo daidda sáhttá váikkuhit. Erenoamáš dehálaš dat lea daidda geat plánejit masterbarggu sosiolingvistihkkii gullevaš fáttás. Bures boahtin ohppui!

Sisdoallu:

Oahpu sisdoallu huksejuvvo sámegiela ja sámi girjjálašvuođa bachelorprográmma gielladieđalaš oahpuid ala. Sisdoalu lea muhtun muddui vejolaš heivehit studeanttaid ovddeš diehtodási ja dutkanplánaid mielde. Oahpu ulbmil lea oahpásnuvvat čuovvovaš gažaldagaide sosiolingvistihka suorggis: kvantitatiivvalaš ja kvalitatiivvalaš dutkanmetodat, gielaid ceavzinnávccat ja daid árvvoštallan, giellaideologiijat, giellapolitihkka, giellarievttit ja giellaplánen. Oahppu addá máŋggabealat gova sosiolingvistihka perspektiivvain ja lahkonanvugiin, ja daid vuođul studeanta hárjána árvvoštallat sámeservošiid ja eará joavkkuid giellasosiologalaš dárbbuid ja viggamušaid.

Oahpu čađaheami maŋŋel lea studeanta olahan čuovvovaš oahppanjoksosiid:
Diehtu:
Studeanta

• dovdá sosiolingvistihka guovddáš teoriijaid
• dovdá sosiolingvistihka guovddáš dutkanmetodaid
• ádde daid historjjálaš duogážiid ja otnábeaivvi dárbbuid, mat leat mihtilmasat áitatvuloš eamiálbmotgielaide

Máhttu:
Studeanta

• bastá oassálastit fágalaš ságastallamii sosiolingvistihka suorggis
• máhttá árvvoštallat giela ceavzinnávccaid
• máhttá analyseret fáktoriid, mat váikkuhit sámeservošiid ja eará joavkkuid gielladiliide ja gielaid ovdánahttimii

Oppalaš gelbbolašvuohta:
Studeanta

• máhttá plánet giela nannen- ja ealáskahttindoaimmaid
• bastá analyseret sosiolingvisttalaš dutkamuša teorehtalaš rámmaid, perspektiivvaid ja metodaid

Čuovvovaš gáibádusat leat eaktun beassat eksámenii:

• studeanta lea searvan unnimustá 80% oahpahussii
• čállit guokte unnimustá 4-siidosaš čálalaš barggu lohkanmeari ja/dahje logaldallamiid vuođul
• ovdanbuktit čálalaš bargguid bargosemináras
• juohke bargosemináras fágalaččat kommenteret unnimustá ovtta mielstudeantta barggu