VSAM-6101 Fágadidaktihkalaš čiekŋudeapmi sámegielas – joatkkaoahppun vuođđoskuvlaoahpaheddjiide
- Oahpu lágideapmi: Neahttadoarjjaoahpahus: Oahpus leat sihke fysalaš deaivvadeamit Sámi allaskuvllas ja neahttaoahpahus. Fysalaš deaivvademiid ii leat vejolaš čuovvut neahta bokte
- Oahpahusgiella: Davvisámegiella
- 10 oahppočuoggá
- Liŋka:
Oahppoplána
- Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no
Dá lea joatkkaoahppu fálaldat oahpaheddjiide geain lea juo 60 oč sámegielas ovdalaččas, ja geat háliidit lassi gelbbolašvuođa hukset sámegiela didaktihkas.
Oahppoovttadaga ulbmilin lea, ahte studeanta vállje fáttá mas guorahallá ja čiekŋuda sámegielfága fágadidaktihkas. Čiekŋudeapmi sáhttá fátmmastit earret eará giellaoahppafáttáid ja oahpahusvugiid, maid bokte oahpaha vuosttaš- ja nubbigiela máhtu ja dáidduid. Čiekŋudeapmi sáhttá fátmmastit lohkan- ja čállinoahpahusa oahpahusvugiid. Dahje čiekŋudeapmi sáhttá deattuhit girjjálašvuođafáttáid ja girjjálašvuođa geavaheami oahpahusas. Studeanta oahpásnuvvá riikkagielat ja riikkaidgaskasaš girjjálašvuhtii. Studeanta čiekŋuda ja heiveha dieđus máŋggagielat ja eatnigielat ohppiid oahpaheamis. Studeanttat hárjehallet dan, mot váldit vuhtii ja heivehit oahpahusas ohppiid lohkan- ja čállinmáhtu vuođul.
Gáibádusat beassat eksámenii:
- Oassálastit 80% lágiduvvon oahpahussii deaivvademiin ja neahttaoahpahusas.
- Studeantta iešheanalis oktagaslaš bargu. Studeanta vállje bargui fáttá (gielas, lohkamis/čállimis dahje girjjálašvuođas) ja dasa heivvolaš lohkanmeari. Fágaoahpaheaddji dohkkeha fáttá ja lohkanmeari. Studeanta čállá čállosa, guhkkodat lea 5-6 siiddu. Studeanta ovdanbuktá čállosa oktasaš semináras. Bagadallan lea oktagaslaš barggu oassin.
- Studeanta galgá kommenteret unnimustá guovtti mielstudeantta ovdanbuktima.
Eksámen:
Oktagaslaš ruovttueksámen (10–15 siiddu), mas studeanta bargá viidáset geatnegahtton bargguin.
Entrance requirements
Čađahuvvon oahpaheaddjeoahppu mii addá gelbbolašvuođa oahpahit vuođđoskuvllas, ja unnimusat 60 oč sámegiella oassin oahpaheaddjeoahpus dahje 60 oč sámegiella sámegiela ja sámi girjjálašvuođa bacheloroahpus dahje vástideaddji oahpus.