Áigot ovdánahttet Sámi dáiddafágaid
Sámi dáiddárráđđi, Sámediggi ja Sámi allaskuvla čoagganedje Diehtosiidii Guovdageainnus ságastallat sámi dáiddaoahpuid birra. Sámi dáiddárráđđi ja Sámediggi leat soahpan dáiddasoahpamušas ahte galgá álggahuvvot gulahallan Sámi allaskuvllain nannen dihte sámi dáiddafágalaš oahppofálaldagaid.
Čoahkkimis ledje oasseváldit eanas Sámi dáiddárráđi miellahttoservviin, ja sii čilgejedje makkár oahppofálaldatdárbbuid sii oidnet iešguđet dáiddasurggiin ja bukte evttohusaid mot sáhtašii nannet gulahallama gaskkal organisašuvnnaid ja Sámi allaskuvlla. Sámi allaskuvlla bealis serve rektor Laila Susanne Vars, goahtejođiheaddjit Lájlá Helene Eira ja Line Kalak, professor Gunvor Guttorm ja May Britt Utsi. Sámi allaskuvla lea váldán badjelasas sámi girječállinoahpu mii ovdal lágiduvvui Sámi girječálliid searvvi ja Sámedikki ovttasbarggu bokte. Čális fal! girječállinoahppu šaddá 2023 rájes sámi girječállinoahppun Sámi allaskuvllas ja dán oahpu sáhttá váldit sierra oahppun dahje oassin eará oahpuin Sámi allaskuvllas.
- Sámi allaskuvla bargá dássedit ovddidan dihte fágaid nu go girjjálašvuođa, duoji ja hábmema min skuvllas. Allaskuvla fállá sihke bachelor ja masteroahpu duojis ja hábmemis, mii leat mielde ovttasbarggus gos lea mihttun ásahit ođđa dáiddafágalaš doavttergráda. Dat attášii min duodje- ja hábmenstudeanttaide vejolašvuođaid joatkit doavttergrádain. Mis lea maid áigumuš luohte- ja sámi musihkkafága nannet allaskuvllas. Mis lea juo buorre vuođđu joatkit dáiddafágalaš oahppofálaldagaid nannemin ja leage buorre gulahallat organisašuvnnaiguin ovdal go mii mearridit makkár dáiddafága suorggi oahpuid mii fállat boahtteáiggis, dadjá Sámi allaskuvlla rektor Laila Susanne Vars.
Čoahkkimis sohppojuvvui ahte joatkit gulahallat dáiddafága oahpuid ovdánahttima birra. 2023:s dollojuvvo ođđa čoahkkin Sámi allaskuvlla ja Sámi dáiddárráđi gaskkas gosa Sámediggi maid searvá.
