June 11. beaivi 2021
Ohcanáigemearri allaskuvladirektevravirgái lea guhkiduvvon
Allaskuvladirektevravirggi árvaluslávdegoddi lea mearridan guhkidit ohcanáigemeari direktevravirgái geassemánu 25. beaivái. Go ohcanáigemearri dievai, de lei boahtán okta ohcci guhte deavdá virggi gelbbolašvuođagáibádusaid, ja árvaluslávdegoddi oaidná dárbbu guhkidit ohcanáigemeari vai olahit eambbo vejolaš kandidáhtaide.
- Árvaluslávdegoddi dáhtošii eambbo ohcciid vai sihkkarastit sihke buori proseassa ja ahte gávdnat rivttes kandidáhta. Mii leat hirbmat duđavaččat ohcciin maid leat ožžon, muhto seammás háliidit iskat leat go olahan buot vejolaš kandidáhtaide ovdal go loahpahit proseassa, dadjá rektor Laila Susanne Vars gii maid lea árvaluslávdegotti jođiheaddji.
