Duddjoma ja hábmema bargovuogit

• 10 oahppočuoggá
• Oahppokoda: DUO 1001
• Oahpu lágideapmi: Neahttadoarjjaoahpahus: Oahpus leat sihke fysalaš deaivvadeamit Sámi allaskuvllas ja neahttaoahpahus. Logaldallamiidda lea vejolaš oassálastit neahta bokte, muhto hárjehusat ja bargobájit gáibidit fysalaš searvama.
• Oahppoplána
• Lohkanmearri: Leganto
• Diibmoplána ja deaivvadanplána: TimeEdit
• Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Oahpu sisdoallu

Duddjoma ja hábmema bargovuogit oahppu fállá duddjomis ja hábmemis praktihkalaš ja teorehtalaš vuođđodieđu. Praktihkalaš duddjon ja hábmenoassi deattuhuvvo. Oahpahusas vuodjut duddjoma ja hábmema vuođđovugiid, teknihkaid, reaidduid ja ávdnasiid geahččaleapmái. Oahpus oahppá ávdnasiid geavahit vuođđun plánemii, ja nuppe dáfus mo barggu pláne guovtte- ja golmmadimenšunála bargovugiiguin. Studeanta sáhttá iežas beroštumi mielde válljet dipma- dahje garraduoji suorggi.

Lagaš luonddu- ja kultuvrralaš biras leat vuolggasadjin duddjoma ja hábmema lahkoneamis. Oahpahusas lea sámiid ja eará eamiálbmogiid duodjeárbevierut vuođđun ja vuolggasadjin.

Oahpahusgiella
Váldo oahpahusgiella lea davvisámegiella. Jus oassi logaldallamiin lea eará sámegielaide, dáro- dahje ruoŧagillii, de dat dulkojuvvo dárbbu mielde. Jus logaldallamat leat eaŋgalasgillii, dat eai dulkojuvvo. Eará sámegielat studeanttaide geahččalit láhčit dili nu ahte sii sáhttet čállit bargguid ja oažžut oasi bagadallamis iežaset sámegillii.

Oahpu gullevašvuohta
Oahppu lea geatnegahtton vuođđooahppu duoji ja hábmema bachelorprográmmas. Dat sáhttá leat maiddái doarjjafágan dahje válljenfágan eará bachelorprográmmain dahje eará oahpuin.

Oahpahan ja oahppanvuogit
Bargobájit, logaldallamat, hárjehusat, bagadallamat ja seminárat.

Gáibádusat beassat eksámenii
Ovdal beassá eksámenii, galgá studeanta:
- Oassálastit unnimusat 75 % lágiduvvon oahpahusas
- dahkat guokte duoji ja portfolio mas leat čuovvovaš barggut:
1. Čilgehus vuosttaš duoji dieđuid háhkamis, plánemis ja bargoproseassas.
2. Čilgehus nubbi duoji dieđuid háhkamis, plánemis ja bargoproseassas.

Fágaoahpaheaddji dohkkeha gáibádusaid beassat eksámenii.

Eksámen
Portfolioeksámen mas leat geatnegahtton barggut oassin. Dasa lassin galgá portfolioi čállit teorehtalaš reflekšuvdnačállosa iežas ovdáneamis oahppanjoksosiid ektui. Eksámen árvvoštallojuvvo oktan bargun.

Árvosánit addojit ECTS vuogádaga mielde A-F, mas A lea buoremus árvosátni, E lea vuolimus ceavzinárvosátni ja F mearkkaša ahte ii leat ceavzán. Muđui čujuhuvvo Sámi allaskuvlla loahpalaš árvvoštallan ja eksámen njuolggadusaide.