BEA 203 Boazoealáhusa ekonomiija ja doaibmabiras

• Oahpu lágideapmi: Neahttadoarjjaoahpahus: Oahpus leat sihke fysalaš oahppodeaivvadeamit Sámi allaskuvllas, ja neahttaoahpahus. Fysalaš deaivvademiide dábálaččat ii leat vejolaš searvat neahta bokte.
• Oahpahusgiella: Oahpahus lágiduvvo dábálaččat davvisámegillii, muhto sáhttá muhtun logaldallan dáro- dahje ruoŧagillii dehe eŋgelasgillii. Oahpahus eŋgelasgillii ii dulkojuvvo. Eará gielaid oahpahus dulkojuvvo dárbbu mielde.
• Oahppokoda: BEA 203
• 10 oahppočuoggá
• Liŋka: Oahppoplána
• Liŋka: Diibmoplána
• Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Oahppu addá álgomáhtu boazoealáhusa ekonomiijas ja doaibmabirrasis, nugo dovdat hálddahuslaš beliid, bargobirasbeliid, almmolaš ekonomalaš statistihkaid ja doarjjavugiid. Dás studeanttat oahpásmuvvet guovddáš beliide boazosámi beaivválaš bargovugiin, ealáhuslágiin ja ođđa birgenvugiid háhkamiin. Oahppu addá maid ekonomiijafágalaš vuođu mainna studeanttat moaitevaččat ohppet árvvoštallat bargobirasbeliid ja almmolaš ekonomalaš statistihkaid ja doarjjavugiid buot golmma davviriikkas.

OAHPAHAN- JA OAHPPANVUOGIT

Oahpahus lágiduvvo logaldallamin, joavkobargun ja čuovvovaš studeantaságastallamin, bagadallamin ja bagadallanseminárain.

GÁIBÁDUSAT BEASSAT EKSÁMENII
Ovdal beassá eksámenii, studeanta galgá:
- Searvan deaivvademiide ja neahttaoahpahussii, unnimusat 75 %.
- Searvan joavkobargui mas joavku bargá casain, ja ovdanbuktá dan studeantajovkui.
- Čađahan ovtta 4−5-siidosaš čálalaš barggu mainna lea bargan olles oahpu áigge ja mii lea vuođđun eksámenii.
- Studeanta galgá ovdanbuktit barggu njálmmálaččat bagadallansemináras.