Studeantan Sámi allaskuvllas
Sámi allaskuvllas lea sámi ja álgoálbmot perspektiivva buot oahpuin ja eanaš oahpuin mii maid sehkkehit árbevirolašmáhtu oahpahussii. Visot oahput leat maiddai sámegillii, nu guhkas go vejolaš ja dokko gos eat nákce sámegillii fállat oahpahusa mii heivehit giela studeanttaid ektui. Min oahpuid bokte oahpásnuvvat iešguđet guovllu sámi servodagaide ja sámiide. Mis lea lagasvuohta min studeanttaide ja unna birrasaččas oaččut lagas oktavuođa iežat mielstudeanttaide. Mis leat jahkásaččat gaskkal 150 ja 200 studeanta geat bohtet Ruoššas, Suomas, Ruoŧas ja Norggas.
Sámi allaskuvllas leat oktiibuot 40 oahppofálaldaga ja jahkásaččat fállojuvvojit 20-24 iešguđet oahpu. Sámi allaskuvlla oahput addet gelbbolašvuođa bargat sámi servodagas iešguđet surggiin, muhto min oahput addet maid gelbbolašvuođa bargat olggobealde sámi servodaga, nu go ovdamearkka dihte eará eamiálbmot servodagas dahje dáčča servodagas.
Smávva ásahusaš - ollu eamiálbmot oktavuođat!
Vaikko Sámi allaskuvla lea unna ásahusaš, de dáppe lea riikkaidgaskasaš biras. Dáppe mii fállat eamiálbmotoahpuid, studeantamátkkiid ja lonohallamiid eará eamiálbmotguovlluide. Dáppe lágiduvvojit dávjá máilmmiviidosaš konferánssat ja mis fitnet njunuš eamiálbmot logaldallit dávjá guossis. Studeantan dus lea vejolašvuohta leat oassi birrásis ja oassálastet konferánssain ja logaldallamiidda.
