Várdduo 2023 dieđabálkkašumi geigen
Sámi allaskuvlla vuosttašamanueansa Ylva Jannok Nutti oaččui Ubmi universitehta Várdduo dieđabálkkašumi 2023. Lávvordaga 19.10. lei bálkkašumi geigejupmi Ubmi universitehta čakčadoaluin gos dieđalaš bálkkašumiid vuostáiváldit maiddái dolle rabas logaldallamiid.
Várdduo dieđabálkkašupmi juhkkojuvvo jahkásaččat olbmui guhte lea bidjan earenoamáš áŋgiruššama dutkamii mas sámi fáttát leat guovddážis. Ylva Jannok Nutti lea ge áŋgiruššan sámi ja eamiálbmotpedagogalaš dutkamii ja su dutkan lea hui viiddis ja lea leamaš dehálaš dekoloniserema ja revitaliserema dáfus. Jannok Nutti lea erenoamáš vuogi mielde bargan sámi pedagogalaš dutkamiin, mas nana dieđalaš máhttu ovttasdoaibmá beaivválaš práksisan skuvllas ja ovdaskuvllas, dainna lágiin ahte buktá ovdan máŋggabealat sámi máhtu. Nie lea čilgejuvvon ákkastallamis manin son oažžu bálkkašumi.
─ Várdduo bálkkašumi oažžut mearkkaša hui ollu munnje go dovddan ahte mu bargu adno árvvus. Háliidan maid ovddidit giitevašvuođa go lean beassan doaimmahit Sámi oahpahusdutkama ovttas čeahpes olbmuiguin viidát Sámis, dadjá 2023 bálkkašumi vuoiti, Ylva Jannok Nutti.
Ovdánahttá fágasuorggi ja vuoruha gaskkusteami
Ylva Jannok Nutti lea vuoruhan gaskkustit iežas dutkanbargguid dieđalaš publikašuvnnain ja dainna lágiin leat su dutkanbohtosat olámuttos viidát, sihke Sámis ja riikkaidgaskasaččat. Sámi allaskuvlla pedagogalaš fágabirrasii lea Ylva Jannok Nutti bargu mávssolaš danin go allaskuvllas lea sihke oahpaheaddjeoahppu ja dutkan. Go Jannok Nutti lea maiddái oahpaheaddjeoahpuid prográmmajođiheaddji, de lea su dutkan hui áigeguovdil ja álkit olámuttos allaskuvlla studeanttaide sin oahpus.
─ Ylva lea máŋggaid jagiid bidjan olu návccaid ovdánahttit dutkama iežas fágasuorggis, oahpaheaddjeoahpuid oahpahusa, joatkkaoahpuid ruoŧabealde ja olu eará doaimmaid. Lei illusáhka go gulaimet su ožžon dán bálkkašumi ja ahte su barggut árvvus adnojuvvojit Sámis, dadjá Sámi oahpaheaddjeoahpuid instituhtajođiheaddji John-Marcus Kuhmunen.
