Suoidnemánu 27. beaivi 2020

Sámi ofelaččat 2020/21 oahppojagi

Elle Rávdná Näkkäläjärvi (19), Guovdageainnus eret, Mirja Cicilia Andersson Renander (18), Nerskogenis eret, Lemet Johanas Nystad (21) Kárášjogas eret ja Vibeke Persen (21), Deanus eret leat válljejuvvon sámi ofelažžan boahtte skuvlajahkái.

- Mun illudan boahtit johtui ofelašjagiin ja lean gearggus buot hástalusaide, dadjá ođđa ofelaš Vibeke Persen duđavaččat.

Sámi nuorat oahpahit eará nuoraid
Sámi allaskuvlla rektor, Laila Susanne Vars geigii guvssiid skeaŋkan ođđa ofelaččaide. Dalle leat ođđa ofelaččat gergosat muitalit sámi kultuvrra birra go gáfestallet.

- Sámi allaskuvla lea hui rámis go beassat fas almmuhit njealje ođđa sámi nuora geat leat válljejuvvon ovddastit ofelašdoaimma. Ofelaččat oahpahit nuoraide miehtá riika sápmelaččaid birra, sámi servodaga ja sámi kultuvrra birra. Eambbo máhttu eastada ovdagáttuid, vaššicealkámušaid ja cielaheami. Sis lea dehálaš bargu ja sámi allaskuvla lágida doaimma ja fuolaha ahte sii sáhttet čađahit sin barggu buoremus lági mielde, vaikko pandemiija áin váikkuha min servodaga ja sáhttá maid váikkuhit ofelaččaid árgabeaivvi, lohká Sámi allaskuvla rektor Laila Susanne Vars.  

Dehálaš máhttohuksen servodahkii sápmelaččaid birra
Máhttodepartemeantta stáhtačálli Anja Johansen dadjá Sámi ofelašdoaibma lea dehálaš.

- Sámit lea oassin Norggas lea dehálaš ahte Norgga nuorat ožžot máhtu sápmelaččaid birra ja sámi kultuvrra birra vai sáhttit eastadit ovdagáttuid ja negatiiva guottuid, dadjá Máhttodepartemeantta stáhtačálli. Son doalai sártni ofelašalmmuheamis.

Ofelaččat čađahit oahpu allaskuvllas ovdal go mátkkoštišgohtet miehtá riikka
Sámi allaskuvla doaimmaha Sámi ofelaččaid ja Gieldda- ja ođasmahttindepartemeanta (KMD) ruhtada doaimma. Ofelaččat čađahit oahpu “Sámi kultur- ja servodatdiehtu” Sámi allaskuvllas. Dasto mátkkoštišgohtet joatkkaskuvllaide ja eará nuoraiddeaivvademiide olles Norggas. Sin váldoulbmil lea muitalit sámi kultuvrra ja servodaga birra eará nuoraide Norggas.