Sámi allaskuvla lea sihkarastán dieđalaš ovdáneami
Máhttodepartemeanta (MD) evttoha dahkat spiehkastaga NOKUT kvantitatiiva gáibádusain Sámi allaskuvlla ph.d.-prográmmii sámegielas ja sámi girjjálašvuođas.
Sámi allaskuvla (SA) lea guhká bargan oažžut Norgga oahpahuseiseválddiid heivehit njuolggadusaid sámiide, unnitlogu álbmogii.
— Mii leat lihkostuvvan oažžut eiseválddiid ipmárdusa dasa ahte sámegiel dutkiohppui ferte láhčit dili, lohká rektor Jelena Porsanger. Oažžut sámegiel dutkioahpu prográmma johtui lea hui stuorra olahus sámi alitohppui ja oppa eamiálbmotmáilbmái. Sámegiella lea unnitlogu eamiálbmotgiella, mii lea rašes dilis miehtá Sámi. Giela ealáskahttin ja ovddideapmi gáibidit nana máhtu, mii lea dutkama vuođul háhkkojuvvon.
Guhká bargan
Sámi allaskuvla hábmii iežas vuosttaš doavttirgrádaprográmma (ph.d.) sámegielas ja sámi girjjálašvuođas 2013:s. Norgga oahpahuskvalitehta goziheaddji orgána (NOKUT) bijai áššedovdilávdegoddi árvvoštallat Sámi allaskuvlla prográmma, Lávdegoddi konkluderii ahte dutkioahppoprográmma lea erenoamáš buorre ja fágalaččat nanus. Allaskuvla ii dattetge sáhttán oažžut lobi (akkrediterema) bidjat prográmma johtui, daningo ii leamašan vejolaš duođaštahttit ahte Sámi allaskuvla oažžu 15 doavttirgrádastudeantta dán prográmmii. Allaskuvla ozai Máhttodepartemeanttas spiehkasteami dan kvantitatiiva gáibádusas geasset jagi 2014. Sámediggi ja Sámi Parlamentáralaš Ráđđi leat dorjon dan.
Njukčamánu 20.b. 2015 Máhttodepartemeanta evttohii dahkat spiehkastaga SA ph.d.-prográmmii ja sáddii dan evttohusa gulaskuddamii. Gulaskuddanáigemearri lea 19.6.2015
(gulaskuddanreive: https://www.regjeringen.no/nb/dokumenter/horing---forslag-til-endring-i-forskrift-om-kvalitet-i-hoyere-utdanning/id2400957/).
MD ákkastallá ahte SA galgá oažžut buori vejolašvuođa ovdánit ja deavdit sámi álbmoga dárbbuid:
Den samisktalende befolkning er liten, men den Samiske høgskolen og det samiske folket står i en historisk særstilling. Dens historie tilsier at det er viktig med økt kunnskap om det samiske, en økt utvikling av det samiske språket og kultur. For å kunne utvikle Samisk høgskole er det derfor viktig at det legges til rette for at høyskolen skal kunne ha en reell mulighet for å gi studietilbud på høyeste nivå, doktorgradsnivå.
Ovttasbarggut eaktun
MD lea bidjan eaktun ee. ahte allaskuvla dahká geatnegahtton ovttasbargošiehtadusaid eará alitoahppoásahusaiguin mat fállet doavttergráda oahpuid, ahte doavttergrádastudeanttat fertejit beassat lonohallamii eará ásahusaide oahpuideaset áigge, ja ahte dutkanbohtosat gaskkustuvvojit riikkaidgaskasaččat eará gillii go sámegillii. Allaskuvlarektor lea duhtavaš:
— Sámi allaskuvla boahtá dál vuoruhit internašunála ovttasbarggu universitehtaiguin, gos leat doavttergrádaprográmmat eamiálbmotgielain ja kultuvrras, dadjá Jelena Porsanger. Mii leat gulahallamin ovttasbargoguimmiiguin Aotearoas (Ođđa Selánddas), Austrálias, Kanadas ja USA:s. Davviriikkaid universitehtat leat iešalddis čielga ovttasbargoguoimmit. Maiddái Hawaiis ja Skottlánddas leat alitoahpu ásahusat geaiguin mii galgat bargat ovttas loahpaha Sámi allaskuvlla rektor Jelena Porsanger.
Mattias Sikku Valio
Diehtojuohkinkonsuleanta/Informasjonskonsulent
