Ođđasat
- Studeantačálus 2: “Movt don sáhtát váiban go leat dušše beaivvi stoahkan mánáiguin?”
- Studeantačálus: Don it leat beare boaris mánáidgárddis bargat
- Doarjja Sámi allaskuvlla joatkkaoahpuide
- Oza čavčča oahpuide!
- Nanu dulkaáŋgiruššan sámegielain Sámi allaskuvllas
- Sámegiela ja sámi girjjálašvuođa masteroahppu addá ođđa bargovejolašvuođaid
- Ovttastallan ja siiddat otnábeai servodagas
- Lihkku beivviin!
- Sámi allaskuvllas lea girjás ja miellagiddevaš prográmma Sámi vahkkus
![](https://samas.no/sites/default/files/styles/hovedbilde/public/field/image/img_0175-3.jpg?itok=20O-iJAV)
Plánegoahtán almmuhit dán jagaš “Sámi logut muitalit” raportta
Sámi statistihka fágalaš analysajoavku leat aitto doallan čoahkkima Gielda- ja guovlodepartemeanttain ja Sámedikkiin dán olis ságastallat Sámi logut muitalit 15. almmuheami birra. Ođđa raporta almmuhuvvo juohke jagi mas sámi statistihkka kommenterejuvvo iešguđet fágasurggiin ja lea dehálaš sidjiide geat háliidit ipmárdusa sámi dilálašvuođaid birra.
Fágalaš analysajoavkku jođiheaddji, dr. Inger Marie Gaup Eira, illuda lanseremii.
- Dat šaddá eanet dárbu ja beroštupmi sámi statistihkkii sihke politihkkariin, dutkiin ja muđui ge servvodagas. Dán jagaš fádda raporttas lea statistihkka sámegiela birra mánáidgárddiin gitta alitoahpahussii ja sámi urbaniseren. Dasto leat statistihkat mat čájehit movt dieđut sámi boazodoalu birra leat rievdame, movt stáda boazodoalu stivren ii dahkko árbevirolaš boazodoalu máhtu mielde ja vel raporta mii čájeha movt gáskkihat jávke boazodoallostatistihkas.
Váldomihttu raporttas lea addit oppalašgova dilálašvuođain ja ovdánandovdomearkkain sámi servvodagas. Raporta dáhtaanalyseren ja statistihkka addá buoret áddejumi ja ipmárdusa sámi dilálašvuođaide, mii sáhttá fas boahtit ávkin sihke stáda eiseválddiide ja Sámediggái go galget bargat viidáset sámepolitihkain.
Fágalaš analysajoavkku sámi statistihkas leat čuovvovaš ovddasteaddjit 2022-2026 áigodahkii:
- Inger Marie Gaup Eira, Sámi allaskuvllas, jođiheaddji joavkkus (várreláhttu: Line Aimee Kalak)
- Eva Josefsen UiT Norgga árktalaš universitehta (várreláhttu: Jan-Erik Henriksen)
- Lars Kirkhusmo Pharo Nuortta Universitehtas (várreláhttu: Asbjørn Kolberg)
- Christian Molstad, Statistihkalaš guovddášdoaimmahagas (SSB) (várreláhttu: Anders Sønstebø)
- Cato Christensen, Oslo Met (várreláhttu: Mona Myran).
Dáppe gávnnat ovddeš almmuhusaid: Almmuheamit | Sámi logut muitalit (samilogutmuitalit.no)
![](https://samas.no/sites/default/files/styles/hovedbilde/public/img_0176-2.jpg?itok=252DpCSO)
Gurut rávddas: Inger Anne S. Triumf, Cato Christensen, Inger Marie Gaup Eira, Jan-Erik Henriksen ja Lars Kirkhusmo Pharo.
Govven/foto: Mai-Lis Eira/Sámi allaskuvla