Ođđasat
- Sámi pedagogihka ovdáneapmi
- Oahppá sámi bajásgeassinvuogi
- SáMOS konferánsa "Unna olbmožiid dihtii" - guhkiduvvon dieđihanáigemearri
- Muitosánit gudneduojár Jon Ole Andersena eretvádjoleami oktavuođas
- Háliidedje oahpásnuvvat Sámi allaskuvllain
- Kuhmunen mielde rámmaplánalávdegottis
- Oza čavčča oahpuide!
- Sámi allaskuvla váldá oasi morrašis
- Rabasbeaivi 2023
![](https://samas.no/sites/default/files/styles/hovedbilde/public/field/image/saia_stueng_foto_mai-lis_eira.jpg?itok=6jCOiNIF)
Nominerejuvvon girjjálašvuođabálkkašupmái
Sámi allaskuvlla stipendiáhtta Saia Marilena Stueng lea nominerejuvvon Davviriikkaid ráđi mánáid- ja nuoraid girjjálašvuođabálkkašupmái girjjiinis "Hamburgerprinseassa eallá dušše oktii”.
- Munnje lea hirbmat dehálaš ahte sámi girjjálašvuohta ja giella adnojuvvo árvvus. Oainnán maid ahte sámegiella ja sámi girjjálašvuođa oahpu lea munnje boahtán ávkin ja lea mu nannen girječállin, dadjá Saia Marilena Stueng.
Girječálli deattuha ahte sutnje lea dehálaš loktet giellaberoštumi ja nannet sámegiela fágalaččat.
- Jus duođaid galggan dadjat, de in rievtti mielde beroš nu olu persovnnalaš gudnejahttimis ja beaggimis, muhto baicce eanet sámegielas ja sámi girjjálašvuođa ovddideamis. Mun sávan ahte dat loktešii dán giellaberoštumi ja árvvu, loahpaha Saia.
Sámi allaskuvlla rektor Liv Inger Somby lea hui ilus go ásahusa doavttirgrádastipendiáhtta oažžu fuomášumi davviriikalaš dásis ja sápmelaš girječállit geat čállet mánáide ja nuoraide leat vadnát.
- Girječállái lea dát stuorra olahus, evttohuvvot Davviriikkaid ráđi mánáid- ja nuoraid girjjálašvuođa šáŋŋeris. Saia Stueng lea čeahpes čálli gii máhttá gávdnat muitalusaid mat heivejit nuoraide, dadjá rektor Liv Inger Somby.
Rektor sávvá Sámi allaskuvlla bealis olu lihkku erenoamáš olahusain ja nominašuvnnain.
- Saia han lea mis nuorra akademihkkár gii dutká girjjálašvuođa ja dát kombinašuvdna riggodahttá fágasuorggi. Dál iluin vuorddašit ahte šaddá go Saia vuosttaš sápmelaš gii vuoitá bálkkašumi dán šáŋŋeris, dadjá Somby.