Musihkka ja juoigan dehálaš oassin oahpaheaddjeoahpuin
Dán vahku lágidii Sámi Musihkkaakademiija oahpahusa Sámi allaskuvlla oahpaheaddjeoahpuid studeanttaide. Dat lea oassin oahpaheaddjeoahpuid fágaid fáttáin nugo ovdamearkka dihtii sámegiela njálmmálaš árbevierut, juoigan ja sámi populearamusihkka.
- Diibmá lei vuosttaš geardde go allaskuvlla oahpaheaddjeoahpuid studeanttat besse searvat Sámi Musihkkaakademiija oahpahussii, ja studeanttat leat muitalan ahte dat lihkostuvai hui bures, dadjá prošeaktajođiheaddji Mai Britt Utsi.
Njálmmálaš árbevieruid dahkat ealasin
Sámi musihkkaakademiija oahpaheddjiin lea alla gelbbolašvuohta musihkas, ja das movt oahpaheaddjin sáhttá sámi njálmmálaš árbevieruid ealasin dahkat jietnageavahemiin, stohkosiid ja čuojanasaid vehkiin. Musihkka ja juoigan gehččo viidát doaban ja reaidun dasa mo sáhttá hervet ja dahkat árgabeaivvi somábun, ja musihkain oažžut buori vásahusa ja energiija.
Sámi musihkkaakademiijas lea sierra viessu mas lea studio, musihkkateknologalaš reaiddut ja sierralágan čuojanasat. Doavttirgrádastipendiáhtta Annukka Hirvasvuopio-Laiti lea prošeaktabargi ja lágida Sámi allaskuvlla beales sámi musihkkavahkku oahpahusa Ohcajogas ovttas akademiija oahpaheddjiiguin.
Ovttasbarggu árvvoštallat fargga
Sámi musihkkaakademiija prošeakta lea guovttejahkásaš ovttabargoprošeakta gaskkal Sámi allaskuvlla, Ohcejoga gieldda ja Sámi Oahpahusguovddáža Anáris. Mai Britt Utsi lea Sámi allaskuvlla beales prošeaktajođiheaddji oktasaš prošeavttas. Son oaidná ahte allaskuvlla studeanttaid buorit vásáhusat Sámi musihkkaakademiija oahpahusain leat mielde loktemin sin duostilvuođa geavahit luođi ja musihka boahttevaš oahpaheaddjiámmáhis.
- Sámi musihkkaakademiija prošeavtta ovttasbargoguoimmit áigot lagamus áiggiid deaivvadit ja árvvoštallet prošeavtta čađaheami, ja mo sáhtášii joatkit dán buori ovttasbarggu boahtteáiggis, dadjá Utsi.
