KIF-lávdegoddi finai Sámi allaskuvllas

Sámi allaskuvllas lei odne čoahkkin KIF-lávdegottiin – Sohkabeallebalánsa ja máŋggabealatvuođa lávdegoddi dutkamis.

Lávdegottis lea mihttu doarjut ja evttohit doaibmabijuid mat galget buoridit sohkabeallebalánsa ja máŋggabealatvuođa universitehtain, allaskuvllain ja dutkanásahusain. Máhttodepartemeantta nammada lávdegotti dábálaččat njealji jáhkkái, ja departemeantta mearrida oktiibidjama ja sturrodaga.

Ulbmil čoahkkimis lei čoahkkinastet allaskuvlla jođihangottiin ja ságastallat dehálaš fáttáid birra dego dásseárvvu, máŋggabealatvuođa, karriearavejolašvuođaid ja searvadahttin. Dasa lassiin háliidii lávdegoddi gullat Sámi allaskuvlla hástalusaid, maid sáhttet atnit vuođđun viidáset bargui go galget ságastallat áššáigullevaš fáttáid birra lávdegotti mandáhta siskkobealde.  Dat ovttasbargu galgá veahkehit ovdánahttit konkrehta doaibmabijuid ja strategiijaid ovddidit sohkabeallebalánsa ja máŋggabealatvuođa sámi dutkanbirrasis.