Movt boazosámi nuorat vásihit rasismma

Eiseválddit leat kárteme movt nuorra sápmelaččat boazoealáhusas vásihit rasismma. Sámediggi ja Dásseárvo- ja vealahanáittardeaddji (DVÁ) leat juolludan 2,25 miljon ruvnnu doarjjan dutkanprošektii mii galgá kártet movt nuorat boazoealáhusas vásihit rasismma. 

Dutkamuš čohkke dieđuid sihke čalmmustahttinjoavkku ja ovttaskas jearahallamiid bokte, go jearahit nuorra sápmelaččaid geat leat gaskal 13-30 jagi. Bohtosat mielddisbuktet eanet máhtu vásihuvvon rasismma birra ja konkrehta doaibmabidjoevttohusaid maiguin eastadit rasismma/vaššiságaid.

Sámi allaskuvlla professora Ketil Lenert Hansen galgá jođihit prošeavtta dassážii go loahpahuvvo. Dat dáhpáhuvvá almmuhansemináras geassemánu 4. b. 2024.

─ Mihá-dutkamuš Nuorra sápmelaččaid psykalaš dearvvašvuohta mii almmuhuvvui 2021:s bođii ovdan ahte sámi nuorain leat iešguđetlágan muitalusat vealaheami, rasismma, givssideami ja neahttacielaheami ja vaššiságaid vásáhusaid birra. Raportta ávžžuhus lea aktiivvalaččat ja vuogádatlaččat bargat eastadan dihtii ahte sámi nuorat vásihit vealaheami ja sápmelašcielaheami. Dán ođđa dutkanprošeavttas áigut mii geahččat lagabui boazoealáhusnuoraid vásáhusaid, dadjá prošeaktajođiheaddji Ketil Lenert Hansen.

- Dát dutkan lea almmuhuvvon doaibmabidjun Sámedikki doaibmaplánas sápmelašcielaheami vuostá. Mun lean duhtavaš go mii dál beassat johtui. Mii diehtit ahte sápmelašcielaheapmi čuohcá nuoraide boazoealáhusas, muhto mii fertet diehtit eambbo movt rasisma dáhpáhuvvá ja movt dat čuohcá nuoraide, čállá sámediggeráđđi Runar Myrnes Balto (NSR) preassadieđáhusas.

Bohccot ja olbmot girtnus.

Govven: Bente Haarstad.

 

Boazoealáhusa nuorat vásihit ollu unohasvuođaid

Dutkanjoavkkus leat mielde prošeaktajođiheaddji Ketil L. Hansen, professor Nils Oskal, professor Anne Lindblom, vuosttašamanueansa Ylva Jannok Nutti ja professor Hadi Lile. Guorahallan čađahuvvo Norgga Boazosápmelaččaid Riikkasearvvi (NBR) ja Sámi joatkkaskuvlla ja boazodoalloskuvlla ovttasbargguin. Referánsajoavkkus leat mielde earret eará NBR nuoraidlávdegoddi, Norgga olmmošvuoigatvuohta ásahusas (NIM), Sámi našuvnnalaš gealbobálvalus – psyhkalaš dearvvašvuođasuddjen ja gárrendilli (SÁNAG) ja RomsaDál.

Sámi allaskuvla álggahii dutkanbargguid 2022:s ja galgá leat gárvvis 2024:s. Guorahallan čađahuvvo Sámedikki ja Dásseárvo- ja vealahanáittardeaddji (DVA) diŋgojumi ja ruhtadeami olis.

─ Rasisma lea duođalaš servodatváttisvuohta ja boazodoallonuorat leat erenoamáš suojeheames joavku mii vásiha ollu cielaheami ja vaššicealkámušaid. Dán prošeavtta ulbmil lea loktet daid vásáhusaid mat nuorra sápmelaččain boazoealáhusas leat rasismma oktavuođas, ja evttohit ulbmillaš doaibmabijuid rasismma ja vaššiságaid vuostá, loahpaha prošeaktajođiheaddji Ketil Lenert Hansen.

Dutkamuša bohtosiid álmmuhanseminára

Sámi allaskuvla bovde seminárii geassemánu 4. beaivvi gos dutkanprošeavtta boađus almmuhuvvo. Seminára sisdoallu:

  • Váldogávdnosat rapporttas ovdanbuktojit.
  • Rapportta ovdanbuktet prošeavtta dutkit.
  • Ovttasbargoguoimmit, ee NBR nuorat besset ieža kommenteret raportta gávdnosiid.
  • Mii bovdet miad preassa čuovvut seminára gaskal dii 13.00-14.00. Dán oasi lea plána rávdnjet.
  • Lágideapmi álgá lunššain dii 12.00-13.00 Sámi allaskuvllas.

Bohtosat mielddisbuktet eanet máhtu rasismma birra ja konkrehta doaibmabidjoevttohusaid maiguin eastadit rasismma/vaššiságaid. 

 

Háliidat go eambbo dieđuid?

Jus dus leat gažaldagat dutkanprošeavtta birra dahje háliidat diehtit eanet dan birra, de sáhtát váldit oktavuođa:

Sámi allaskuvlla dutki Ketil Lenert Hansen, prošeaktaovddasvástideaddji: E-poasta: ketill@samas.no. Telefovdna: 907 91 116.