Open Access - studeanttabarggut
Eanas allaskuvllat ja universitehtat Norggas vurkkodit ovddeš studeanttaid bachelor- ja masterbargguid. Dát barggut leat dehálaš oassin ásahusa ovdáneamis ja historjjás, ja mielddisbuktet ahte resurssat ja máhttu juogaduvvo studeanttaid, ásahusaid ja dutkiid gaskkas. Sámi allaskuvla atná bargguid almmuheami dehálažžan ja buorre vejolašvuohtan studeanttaide márkanfievrridit iežaset ja iežaset bargguid.
Sámi allaskuvla lea mearridan váldit atnui Open Access vuogádaga almmuhit studeanttaid bargguid. Open Access lea vuogádat mainna sáhttá almmuhit internehttii vai buohkat sáhttet oaidnit almmuhusaid nuvttá. Almmuheapmi dán vuogádaga bokte mielddisbuktá ahte dieđalaš publikašuvnnat šaddet gávdnan ládje interneahtas dakkaviđe ja agibeaivái. Čállis dahje vuoigŋadahkkis (opphavsmann) lea publikašuvnna dahkkivuoigatvuohta, muhto geavaheddjiide addo lohpi lohkat, máŋget, viežžat, čálihit, juogadit, ohcat teavsttas dahje liŋket tekstii buhtadusa haga.
Sámi allaskuvlla dutkan- ja oahppostivra lea 30.1.2014 čoahkkimis DOS 1/2014 áššis DOS 3/14 mearridan ahte buot Sámi allaskuvlla bachelor- ja masterbarggut mat lea árvvoštallojuvvon árvosániin A, B dahje C almmuhuvvojit Sámi allaskuvlla rabas, digitála vuorkká bokte. Eaktun almmuheapmái lea ahte čálli lea čálalaččat mieđihan almmuhit čállosa. Bargguin main lea jávohisgeatnegasvuohta ja bohtet almmolašvuođalága § 13 ja hálddašanlága § 13 vuollai, eai almmuhuvvo. Maiddái prošeaktabarggut dahje čiekŋudanbarggut sáhttet almmuhuvvot. Dát almmuhuvvojit girjerádjosii báberhámis. Maiddái dán almmuheapmái lea eaktun ahte čálli mieđiha almmuheapmái. Kvalitehtasihkkarastima dihte almmuhuvvojit dušše barggut mat leat árvvoštallojuvvon árvosániin A, B dahje C.
