Eará geavatlaš dieđut

Preassadieđáhus ovdal nákkáhallandilálašvuođa

Go lea sohppojuvvon goas geahččaladdanlogaldallan ja nákkosdilálašvuohta dollojuvvojit, de kandidáhtta deavdá preassadieđáhusskovi mii lea Sámi allaskuvlla ruovttusiiddus. Son sádde skovi Sámi allaskuvlla diehtojuohkinkonsulentii, gii ráhkada kandidáhta vehkiin preassadieđáhusa nákkáhallandilálašvuođa birra. Diehtojuohkinkonsuleanta sáhttá váldit gova kandidáhtas. Jus nákkosgirjji bearpma maŋŋesiiddus lea nákkáhalli govva, de dát seamma gova sáhttá adnojuvvot maiddái preassadieđáhusas.

Nákkáhallama preassadieđáhusas almmuhuvvo maiddái liŋka Sámi allaskuvlla nákkáhallansiidui, ja dan siidui lasihuvvo dađistaga maiddái nákkosgirjji liŋka.

Nákkáhallanbeaivvi lunša, gáfestallan ja doavttirdoalut dahje -mállásat

Geahččaladdanlogaldallama maŋŋil lágiduvvo lunša. Fágagoahti bovde nákkáhallanjođiheaddji, árvvoštallankomitea, bagadalliid, doavttirgrádastudeantta ja vejolaččat su lagamus bearraša lunšii ja ásahusas rektora ja prográmmajođiheaddji.

Nákkahállandilálašvuođa maŋŋel lea gáfestallan.

Doavttirdoalut dahje doavttirmállásat lea eahketdoalut, maid nákkáhalli sáhttá lágidit jus háliida. Dát mállásat eai leat bákkolaččat, muhto dát lea vuogas vuohki loahpahit nákkáhallanbeaivvi allaárvosaš doaluid. Dákkár doavttirmállásat leat šaddan unnit formálalaččat maŋimuš jagiid áigge. Čuovvovaš vugiid doalahit dábálaččat doavttirmállásiin: Nákkáhallama jođiheaddji berre bovdejuvvot oktan árvvoštallankomiteain, ja maiddái bagadallit leat doavttirmállásiid bovdejuvvon guossit. Nákkáhalli sáhttá bovdet maiddái iežas fágalaš kollegaid ja bearraša.  

Nákkáhallama jođiheaddji doallá dábálaččat vuosttaš sártni. Dan maŋŋel boahtá goalmmát opponeanta (komitea jođiheaddji) gii doallá sártni mállásiid maŋŋel. Jus goahtejođiheaddji (ja jus son ii leat nákkáhallama jođiheaddji) searvá mállásiidda, de son sáhttá doallat sártni  goalmmát opponeantta maŋŋel. Bagadalliid sárdnevuorru  lea goahtejođiheaddji maŋŋá. Jus leat eará sártnit, de daid ortnet lea friddja.

Nákkáhallamii gullevaš goluid eretgeassin vearrodieđáhusas

Norgga vearroetáhta addá kandidáhttii rievtti geassit eret goluid mat leat čuožžilan nákkosgirjji deaddileami, mátkkošteami ja doavttirgrádamállásiid oktavuođas. Dán birra sáhttá eanet lohkat Vearroetáhta neahttasiidduin: https://www.skatteetaten.no/person/skatt/hjelp-til-riktig-skatt/arbeid-trygd-og-pensjon/utdanning/fradrag-for-kostnader-til-doktorgrad/.