Kalstad álgá ođđa direktevran
Ovdal geasi almmuhuvvui ahte stivra virgáda Johan Ailo Kalstad (38) ođđa direktevran. Ja dal lea Kalstad formálalaččat váldán vuosttá virggi ja lea čielggas ahte son álgá direktevran.
Boahttevaš allaskuvladirektevra lea Guovdageainnus bajásšaddan ja lea alit oahpu váldán Sámi allaskuvllas (journalistihka) ja Norgga gávpeallaskuvllas (Norges Handelshøyskole). Johan Ailos lea bargoduogáš Geelmuyden.Kieses, Statkraftas, NRKs ja iežas ráđđeaddifitnodagas. Kalstad lea bargan eanaš strategiijain, gulahallamiin ja jođihemiin.
– Nugo mun dovddan Johan Ailo Kalstad, de sáhttá son oaidnit viidát ja gii sáhttá sihke čavga čuovvut dan maid mii ásahussan leat geatnegahtton bargat ja sáhttá viidábut oaidnit áššiid, ja mun jáhkán ahte son šaddá buorre jođiheaddji. Sámi allaskuvla galgá mannat čađa ollu ođasmahttimiid ja mun jáhkán ahte Kalstad sáhttá minguin veahkkálagaid ollašuhttit daid ođasmahttimiid, dadjá Sámi allaskuvlla stivrajođiheaddji ja rektor Gunvor Guttorm.
– Mu mielas lea máilmmi somá go dál beasan Sámi allaskuvllas bargagoahtit. Dat lea iešheanalaš ásahus mas lea duohta njunuš álgoálbmot čehppodat. Jáhkán ahte allaskuvllas leat hui buorit vejolašvuođat ja mun háliidan leat mielde daid duohtan dahkat, dadjá Johan Ailo Kalstad.
Kalstad joatká allaskuvladirektevran Maaren Palismaa maŋŋel, guhte lea leamašan direktevran 2011 rájis. Johan Ailo Kalstad álgá direktevran ođđajagimánus 2017. Lea jahkemearrevirgi 6 jahkái, 11.1.2017 – 10.1.2023.
