VALG-6100 Álgooahpahusa čiekŋudeapmi – joatkkaoahppun vuođđoskuvlaoahpaheddjiide
- Oahppočuoggá: 25
- Diibmoplána ja deaivvadanplána: Time Edit
- Oahppoáigi: Ovtta lohkanbaji badjel
- Oahpu lágideapmi: Neahttadoarjjaoahpahus: Oahpus leat sihke fysalaš deaivvadeamit Sámi allaskuvllas ja neahttaoahpahus. Fysalaš deaivvademiid ii leat vejolaš čuovvut neahta bokte.
- Oahpahusgiella: Davvisámegiella
- Ohcanwebas: Vállje 6024
- Sisabeassangáibádusat
- Čađahuvvon oahpaheaddjeoahppu mii addá gelbbolašvuođa oahpahit vuođđoskuvllas
- Sámegielmáhttu
Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.
- Sisdoallu
Fága čiekŋuda álgooahpahusa ceahki ohppiid oahppamii ja skuvlaovdáneapmái. Čiekŋudeami mihttun lea addit studeanttaide reaidduid, maiguin sihkkarastit 1.- 4. ceahki ohppiide vejolašvuođa háhkat vuođđomáhtu lohkamis, čállimis ja matematihkas ja vuhtii váldit maiddai estehtalaš ja praktihkalaš beliid álgooahpahusas. Čiekŋudeami ulbmilin lea nannet oahpaheaddji návccaid oaidnit oahppi ollislaččat, vai son nagoda sihkkarastit ahte buot oahppit besset háhkat alcceseaset fágalaš ja sosiálalaš gelbbolašvuođa skuvllas.
- Gáibádusat beassat eksámenii
Čuovvovaš gáibádusat ovdal studeanta beassá eksámenii:
- Oasálastán 80 % lágiduvvon oahpahusas, deaivvademiin ja neahttaoahpahusas.
- Studeanta galgá čállit 10 oanehis reflekterejeaddji čállosa mat čatnasit álgooahpahusa váldofáttáide. Juohke oanehis čálus galgá leat gaskkal 1-2 siiddu.
- Eksámen
Eksámen lea čálalaš ruovttueksámen mas studeanta čállá 15-20 siidosaš esseija álgooahpahusa iešvuođain iežas válljejuvvon fáttás.
