Akademalaš čállinkursa
Sámi allaskuvla ja UiT Norgga árktalaš universitehta lágidit ovttas akademalaš čállinkurssa 2014 čakčalohkanbaji. Kursa lea oaivvilduvvon buot dieđasurggiid dutkiide, doavttirgrádastudeanttaide ja mastergrádastudeanttaide, geat máhttet čállit sámegillii ja geat áigot čállit dieđalaš artihkkala sámegillii. Ulbmilin lea ahte oasseváldit čálligohtet kurssa áigge artihkkala, man álgoveršuvnna ovdanbuktet kurssa oasseváldiide ja maid sáhttet maŋŋel fállat omd. Sámi dieđalaš áigečállagii.
Kurssas leat golbma váldofáttá: dieđalaš artihkkala huksehus, dieđalaš artihkkala čállin sámegillii ja giellateknologiija veahkkin sámegiela dieđalaš čállimis. Dasa lassin Sámi dieđalaš áigečála (SDÁ) doallá kurssa oktavuođas diehtojuohkima, mas muitalit SDÁ vuordámušaid, gáibádusaid ja oppalaš doaimmahanproseassaid birra. SDÁ diehtojuohkin lea rabas maiddái earáide go čállinkurssa oasseváldiide.
Kursabeaivvit leat 27.–29.8. ja 27.–28.11. Vuosttaš čoagganeapmi lágiduvvo Sámi allaskuvllas, ja dasa sáhttá searvat jietna-govvastudio bokte Romssas. Nubbi čoagganeapmi lea Romssas. Kurssa oahpaheaddjin leaba Johanna Johansen Ijäs Sámi allaskuvllas ja Jussi Ylikoski UiT Norgga árktalaš universitehtas.
Dat geat háliidit searvat kursii, galget čállit oanehis ohcama mas leat dát dieđut:
- ohcci namma
- ásahus
- akademalaš gráda
- fágasuorgi
- leago ovdal čállán dieđalaš čállosiid
Ohcamii galgá čállit maiddái 200–300 sáni abstrávtta, mas čilge makkár artihkkala áigu čállit. Abstrávttas berrejit leat dát dieđut:
- bargogažaldat
- teorehtalaš vuolggasadji
- metoda
- dutkanmateriála
- bohtosat
Ohcan ovttas abstrávttain sáddejuvvo Sámi allaskuvlla dutkankonsulentii, John Anders Sikkui: John-Anders.Sikku@samiskhs.no. Áigemearri lea guhkiduvvon geassemánu 6. beaivái.
Kurssas lea sadji 15 oasseváldái.
Eanet dieđuid kurssa birra addá Johanna Johansen Ijäs, johanna.ijas@samiskhs.no,
tlf. 78 44 85 19.