BA - Sierra kursa

SAM 244 Láidehus sámi sosiolingvistihkkii

  • Oahpahusgiella: Davvisámegiella
  • Oahpahusbáiki: Sámi allaskuvllas
  • 10 oahppočuoggá
  • Diibmoplána: TimeEdit Samisk Høgskole - Sámi allaskuvla
  • Gursa gullá Sámegiela ja sámi girjjálašvuođa bachelorprográmma giellasuorggi doarjjafágaide.


Sámegielat, dego máilmmi gielat oppanassiige leat hui miellagiddevaš proseassaid gaskkas. Nubbe dáfus eamiálbmogiid ja unnitloguid gielat leat gillán garra assimilašuvnnas, ja máilmmeviidosaččat gielat jávket jođaneappot go goassige olbmo historjás. Nubbe dáfus gielaid ealáskahttin ja nannen lea jođus birra máilmmi. Dát kursa vuodju daidda proseassaidda.
 

Manne máŋga guovlluin Sámis sámegiella lea jávkan bearrašiin ja riikkagiella lea boahtán sadjái? Mo giela sáhttá váldit ruovttuluotta? Mo riikkapolitihkka váikkuha olbmuid viggamušaide iežaset gielaid seailluheami ja ovdánahttima ektui? Makkár diliin mánná sáhttá bajasšaddat máŋggagielagin? Mat leat gielalaš olmmošvuoigatvuođat?

Kurssas don beasat oahpasmuvvat máilmmi gielaid ja erenomážit sámegielaid dálá dillái. Dat addá dutnje vuođđodieđuid giellamolsuma sivaid ja čuovvumušaid birra ja giela seailluheami ja ealáskahttima vejolašvuođaid birra. Kurssa oahpista maiddái guokte- ja máŋggagielatvuhtii ja dasa, mii sosiolingvistihka lea ja manne dat lea sámedutkamuša dehálaš oassi.

Sisabeassangáibádusat

Studeanta lea čađahan dahje čađaheame Sámegiela ja sámi girjjálašvuođa bachelorprográmma vuođđooahpuid ja giellafágalaš fágaoahpuid (gč. prográmmaplána) dahje sus leat vástideaddji alit dási oahput.

Sámegiela ja sámi girjjálašvuođa bachelorprográmma oppalaš sisabeassangáibádusat leat čilgejuvvon oahppoprográmmaplánas.