BA - Sierra kursa

SÁM 110 Sámegiella njálmmálaš ja čálalaš giellan

Oahppu gullá sámegiela ja sámi girjjálašvuođa bachelorprográmma fágaoahpuide, muhto heive buot sámegiellaberošteddjiide ja dutnje gii áiggošit bargat sámegielain. Oahppoovttodat lea oassin prográmmaoahpus Sámegiella ja sámi girjjálašvuohta 2. 

Oahpus leat guokte váldooasi. Vuosttaš oasis studeanta oahpásmuvvá sámegielaid gaskasaš deaŧalaš erohusaide ja oažžu čielga gova davvisámegiela suopmanvariašuvnnas sihke oarjjil nuorttas ja siseatnamis mearragáddái. Nuppi oasis fas studeanta oahpásmuvvá gielladikšuma vuođđoáššiide ja ulbmiliidda. Áššeteavsttaid guovddáš iešvuođat guorahallojuvvojit gielladikšuma oainnus. Váldogielaid váikkuhusa dáfus deattuhuvvojit skandinávalaš gielat.

Sisabeassangáibádusat

  • Dábálaš sisabeassangáibádusat alitoahpahussii. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga) dahje realagelbbolašvuohta.
  • Lassin galgá sámegiela máhttu vuosttaš- dahje nubbingiellan joatkkaskuvllas dahje vástideaddji (omd. sámegiela lohkanbadjeoahppu).
  • Dasa lassin studeanta galgá leat čađahan SÁM 108 Davvisámi fonetihka, fonologiija ja čállinvugiid ja SÁM 102 Davvisámegiela morfologiija ja cealkkaoahpa dahje vástideaddji oahpuid.