Oahpaheaddjeoahput: Espen Eira

Espen Eira válddii oahpaheaddjeoahpu Sámi allaskuvllas ja oaččui barggu Guovdageainnu nuoraidskuvllas ovdal go gearggai oahpuin. – Dat ledje gullan ahte mun ledjen oahpaheaddjeskuvlla vázzime, ja sii dárbbahedje oahpaheddjiid, muitala Espen.

 

Go Eira ieš vácciii nuoraidskuvllas de doaivvui ahte oahpaheaddjevirgi lea lossa bargu, ja álggii ohppui veahá soaittáhagas.

- Mun in lean rievtti mielde válljen šaddat oahpaheaddjin, muhto mus ledje olbmát geat álge oahpaheaddjiohppui. Mun ieš ledjen álgán eará ohppui mii ii heiven munnje. Mun jurddašin ahte mun álggán sin mielde oahpaheaddjeoahpu vázzit, ja dán in leat goit gáhtan.

Miehta Sámi perspektiiva

Sámi allaskuvla oahpaheaddjeoahpu studeanttat mannet hárjehallamii sihke Norgga-, Suoma ja Ruoŧabeali skuvllaide gos leat sámi oahppit. 115 beaivve hárjehallan juhkko dássedit njealji vuosttaš jahkái. Eira lei vuosttáš jagi hárjehallamis Guovdageainnus, ja nuppi jagi lei son Ruoŧa bealde.

- Hárjehallamis bessen oaidnit movt earáin lea dilli. Muhtun sajiin dieđusge ii leat sámegiella lihkká nanus nu movt omd dáin guovddáš sámi guovlluin. De fuobmá maid man dehálaš dat lea ahte mis leat oahpaheaddjit geat leat váldán Sámi oahpaheaddjeoahpu.

Son čilge viidáset ahte Sámi oahpaheaddjeoahpus ohppe juoga maid gohččodit miehta Sámi perspektiiva ja muitala ahte dat oahpu lea ávkkálaš go njuike bargodillái.

- Miehta Sámi perspektiiva lea olles Sápmi, visot Davviriikkain. Mii beasaimet vásihit ja oaidnit movt dilli lea sámi skuvllain. Nu ahte beassá maid vásihit, ii ge dušše lohkat girjjiin. Bargodilis deaivá iešguđetlágan ohppiid geat leat iešguđetge servodagain eret. Miehta sámi perspektiivva lea hui stuora veahkkin.

Eira čilge ahte vaikko lea ge Sámi oahpaheaddjeoahpu lohkan, de ii dárbbaš šaddat dušše sámegiel oahpaheaddji. Oahpaheaddji bargu lea viiddis fága ja lea vejolaš bargat fágaiguin masa lea beroštupmi.

- Sámi oahpaheaddjeoahpus lea dieđusge maiddái sámegiella, muhto mun in oahpat sámegiel fágaid. Dat ii leat munnje lihkka lunddolaš oahpahit dego servvodat- ja lášmmohallanfágaid. Lášmmohallan lea munnje hui dehálaš. Go mun dáinna beasan bargat, de dovddan iežan oadjebassan ja dat lea munnje hui somá oahpahit.

Háliidii orrut ruovttubáikkis

Sámi vuođđoskuvlaoahpaheaddjeoahpu 1.-7. ceahki masteroahpahus lágiduvvo geabbilisoahppun, mii sisttisdoallá fágalaš deaivvademiid, neahttavuđot oahpahusa ja hárjehallamiid. Deaivvademiin oktasaš ságastallan ja bagadallan lea guovddážis. Espenii heivii dat hui bures.

- Dat báddejit daid logaldallamiid nehttii. Beare lea interneahtta, de sáhttá bargat gos ieš háliida go eai leat deaivvadeamit.

Son muitala ahte sis ii lean beare stuora luohkká ja dat dagahii ahte čuovvoleapmi lei buorre.

- Mun ferten lohkat ahte mun lean hui duhtavaš oahpaheddjiiguin mat mus leat leamaš. Mun goit dovddan ahte ohppen bures, ja mun in jáhke gostege eará sajis lea nu buorre čuovvoleapmi go dáppe. Mis ledje neahttalogaldallát ja jus lei mihkke de lei beare mannat daid lusa ságastallat, loahpaha Espen Eira.

 

Dán plakáhtas oainnat makkár báikkiide lea vejolaš beassat go lea hárjehallan áigi oahpaheaddjeoahpus.