Buozalmasjávkan ja iešdieđáhus

(Rievdaduvvun 25.03.21)

01.06.20 rájes leat dábálaš iešdieđáhusnjuolggadusat mat gustojit, dat guoská maiddái koronarelaterejuvvon jávkamiidda. Dat mearkkaša ahte sáhtát iešdieđáhusa geavahit eanemusat 8 beaivvi. Gáibiduvvo doavtterduođaštus jus jávkan bistá guhkit. 

Jus geavahat iešdieđahusa koronarelaterejuvvon jávkama olis, de merket ESSii iešdieđáhusa oktan kommentáran “korona”. Bargoaddis dábálaččat ii leat riekti diehtit diagnosa, muhto láhkaásahus FOR-2020-03-20-368 § 3-1(mearriduvvon 20.03.20) eaktuda ahte bargoaddi diehtá lea go jávkan koronarelaterejuvvon go meannuda jávkamiid.

Eambbo dieđuid sáhtát oažžut bargiidossodagas bargiidossodat@samas.no

Mii gusto jus gohčohallat erremii

Jus gohčohallat erremii, de sáhttá dus leat riekti buohccindieđiheapmái. Seamma gusto jus gohčohallat ”vuordinerremii” (ng. Ventekarante).  Dus ii leat riekti buohccindieđiheapmái jus dus lea vejolašvuohta čađahit bargguid ruovttukantuvrras. Loga eambbo dás.

Dákkár dilálašvuođain lea dehálaš ahte gulahallat iežat lagamus hoavddain.  

Erren- ja buozalmasvuođadieđuid gieđahallan

Jávohisgeatnegasvuohta ja GDPR
Ovttaskas bargi sivva jávkamii lea čadnon sihke jávohisgeatnegasvuhtii hálddašanlága §13 ja GDPR-njuolggadusaid vuođul. Bargoaddis ii leat álgovuorus vejolašvuohta daid mearrádusaid vuođul juohkit dieđuid ovttaskas bargi birra siskkáldasat bargiide dahje earáide. Bargi sáhttá dattege mieđihit bargoaddái dákkár dieđuid juohkit. Mieđáhus galgá leat addon eaktodáhtolaččat ja lea dehálaš ahte dieđut eai juhkkojuvvo viidát go dan masa bargi lea miehtan.

Diehtojuohkin erremis- ja buozalmasvuođas
Jus ovttaskas bargis duođaštuvvo koronadávda, de čuovvulahtta suohkana dearvvašvuođabálvalus bargi ja su oktavuođaid, gustojeaddji njuolggadusaid vuođul, sihkkarastin dihte dohkálaš dearvvašvuođaveahki ja guorrat njoammuma. Geahča eambbo dás.

Deattuhuvvo ahte bargoaddi sáhttá juohkit dieđuid siskkáldasat jus muhtin bargi lea erremis dahje lea njommon koronadávdii, jus dat lea áibbas dárbbašlažžan sihkkarastit dohkálaš bargibirrasa. Dákkár áššiin galgá dahkot sierra árvvoštallan ja suohkandoavttir galgá leat mielde dan árvvoštallamis. Árvvoštallan galgá dahkkot ovttasráđiid bargiin, go lea dehálaš vuhtiiváldit bargi árvvolašvuođa ja integritehta. Geahča eambbo Datatilsyna siiddus dás. Dákkár dilálašvuođain eai galgga juhkot eambbo dieđut go dárbbašlaččat.