Ann Máret Eira. Govven: Niels Ovllá Oskal Dunfjell

cuoŋománu 05. beaivi 2022

Bacheloroahppu boazodoalus

Ann Máret Eira lea gazzan boazoealáhus-bacheloroahpu Sámi allaskuvllas. Dál lea sus hui relevánta bargu Nannet-nammasaš prošeavttas.

Čállán: Niels Ovllá Oskal Dunfjell

Guovdageaidnulaš Ann Máret Eira lea bajásšaddan boazodoalus. Vaikko ii bargga boazobargin, de lea boazoealáhus liikká su eallinláibin dál. Ann Máret beassá bargat guoskevaš áššiiguin Nannet-prošeavtta bokte.

Nannet lea golmma jagi geahččalanortnet mas mihttun lea cegget bistevaš ráđđeaddin- ja resursaguovddáža boazoealáhusa váste.

Son illá jáhkká ahte livččii fidnen dán barggu relevánta oahpu haga.
 

Háliidii eará bálgáid duolbmat

– Mun lean hui ilus go dán geainnu válljejin! Golihedje han máŋga jagi ovdal gávnnahin maid háliidin bargat, lohká Ann Máret.

Son váccii boazodoallolinjjá Sámi joatkkaskuvllas ja boazodoalloskuvllas Guovdageainnus ja válddii vel lohkangelbbolašvuođa goalmmát jagi. Son ii šaddan boazodoallooahpahallin.

– Go gergen joatkkaskuvllas, de bargagohten dearvvašvuođasuorggis. Doppe bargen máŋga jagi. Loahpas gávnnahin ahte in háliidan dearvvašvuođabargin bargat.

Nu de ozai oahpuide Sámi allaskuvlii. Álggos logai riektadieđafága, mas dál lea namman Sámeriekti, ovdal go fuomášii álgit boazoealáhus-bachelorohppui, olles jahkebeali maŋŋel go earát.

– Mun oainnat muitájin man bures lokten boazodoallolinnjás joatkkaskuvllas go mearridin álgit, dadjá son.

Heive boazobargái maid

Sámegiella ja nanu sámi biras lei hui dehálaš sutnje.

– Bachelorprográmmas oahpat olu! Oahppu heive sihke dasa geas lea beroštupmi boazodoalu iešguđet beliide, muhto maiddái boazobargái, lohká Ann Máret ja joatká:

– Oahpus deattuhuvvo earet eará riektevuođđu, makkár rievttit boazodoalus leat, mii lea ge hui ávkkálaš ja áigeguovdil dál go boazodoallu vásiha olu sisabahkkemiid.

Bachelorprográmma lea heivehuvvon boazodoalu jahkeáigodagaid mielde. Dalle go son ieš lei studeanta, lei vejolaš kombineret oahpu boazobargguiguin, muhto gáibiduvvui gal nana iešheanalašvuohta.

Dárbu fágačehpiide

Iešheanalaš ferte dál maid leahkit. Maŋŋel oahpuid barggai Ann Máret álggos muhtun jagiid Ealáhus ja boraspiret Finnmárkkus-prošeavttas, muhto juovlamánus virgáduvvui Nannet-prošektii.

Álgománuid lea bargan neahttasiiddu hábmemiin. Dađistaga vurdet eambbo boazoealáhussii guoskevaš áššit.

– Ulbmil ja mihttu prošeavttain lea ahte orohagat galget boahtteáiggis oažžut veahki ja eará bálvalusaid dán ráđđeaddin- ja resursaguovddážis. Dákkár guovddáš galgá maiddái loktet gelbbolašvuođa boazodoalus.

– Mu bacheloroahpus lea hui stuora ávki dán barggus. Jus lea beroštupmi boazodollui, de ávžžuhan ohcat boazoealáhus-bachelorohppui! Lea dárbu dakkáriidda geain lea sihke boazodoalloduogáš ja fágamáhttu ealáhusa birra, loahpaha Ann Máret.

Loga eambbo boazoealáhus-bachelorprográmma birra dás. Ohcanáigemearri lea cuoŋománu 20. beaivve.

Oza boazoealáhus bachelorohppui!