Bargit geat rasttildit riikarájáid

 Ođastuvvon njukčamánu 26.b. 2020

Makkár guovllus boađát?

Sámi allaskuvla ávžžuhus lea ahte unnimus lági mielde mátkkoštit. Čuovo fal mielde Álbmotdearvvašvuođainstituhta bagadusaid rádjárasttildemiid hárrái. Ođđajagimánu 29. beaivvi rájes lea garrasit ráddjejuvvon geat rájáid besset rasttildit Norgii. Jus lea dárbu Norgii beassat de fertet dárkilit lohkat njuolggadusaid mat gusket earret eará beasat go rasttildit ja gáibiduvvojit go iskkadeamit ja erren go boađat Norgii.

Njukčamánu 1. beaivvi rájes lea bargiide geat beaivválaččat bohtet Suomas ja Ruoŧas Norgii bargosadjái lohpi rasttildit riikarájá. Gáibiduvvo earret eará ahte máhttá duođaštit negatiivvalaš covid-19 iskosa mii ii leat boarráset go vahkku, iige beasa idjadit Norggas. . Rája nalde maid gáibidit duođaštusa man sáhtát diŋgot bargiidossodagas (bargiidossodat@samas.no)

Fuomáš ahte bargit geat bohtet Norgii ja leat beassan spiehkastit errengáibádusas besset boahtit bargosadjái. Galgá aŋkke doallat nu unnán oktavuođa sihke mielbargiiguin, studeanttaiguin ja earáiguin go vejolaš. Dat mearkkaša earret eará ahte ii beasa searvat logaldallamiidda dehe čoahkkimiidda jus daid lea vejolaš lágidit digitálalaččat. Jus ii leat vejolaš, de galgá sierra riskaárvvoštallan čađahuvvot mas doaibmabijut čilgejuvvojit.

FUOMÁŠ! Bargi lea ieš ovddasvástideaddji iskat galgá go erremii maŋŋil riikarájiid rasttildeami, ja man guhká errenáigodat lea. Bargi ferte ieš dárkkistit njuolggadusaid ovdal go vuolgá gosa ge.

Váldde oktavuođa bargiidossodagain jus dárbbašat bagadusaid njuolggadusaid hárrái dehe dárbbašlaš duođaštusaid maid rádjágoziheaddjit gáibidit.