Publikašuvnnat

Sámi allaskuvlla dutkama gaskkusteapmi čađahuvvo máŋgga ládje: publikašuvnnaid bokte, oahpahusa bokte, media bokte, logaldallama bokte ja eará populearadieđalaš doaimmaid bokte.

Neahttavuogádagat
Cristin- ja Brage leat Sámi allaskuvlla neahttavuogádat gos gávnnat Sámi allaskuvlla dutkiid ja studeanttaid publikašuvnnaid. 

Dieđalaš áigečállagat
Dieđut lea Sámi allaskuvlla dieđalaš áigečála gos almmuhuvvot sámedutkama bohtosat nugo artihkalčoakkáldagat ja sierranas dutkamušat servodat-, gielladutkamis ja láhkadiehtagis. Almmuheamit leat sáme-, dáro-, ruoŧa-, suoma-, eŋgelas- ja ruoššagillii. Sámi allaskuvla lea maiddái almmuhan badjel 20 jagi Sámi dieđalaš áigečallaga ovttas Romssa universitehta Sámi Dutkamiid guovddažiin. Sámi dieđalaš áigečála lea máilmmi áidna dieđalaš áigečála sámegillii ja das lea fágaguoibmeárvvoštallanortnet (referee).

SA-oahpahusčálus
Min ráidu oahpahusčállosiid várás gohččoduvvo SA-oahpahusčálus. Das almmuhuvvojit min oahpaheddjiid oahpahangihppagiid, mat allaskuvlla oahpahusas geavahuvvojit. Dáid almmuhemiid lassin almmuhuvvo eará čállosat, mat eai boađe makkárge ráiddus, nu go ovdamearkka dihte Sámi allaskuvlla 20 jagi ávvugirji "Sámi oahpahus - Sámi dutkan - Sámi ásahus" mii bođii 2009. Allaskuvla buvttada maiddái publiseremiid ovttas eará ásahusaiguin.

Ollislašgovva Sámi allaskuvlla dieđalaš publikašuvnnaiguin