December 02. beaivi 2022

Čohkkeje boazosápmelaččaid Sámi allaskuvlii

Birrasiid 200 olbmo ledje čoahkkanan Boazodoallokonferánsii 2022 Diehtosiidii. Konferánsa lea ovttasbargu gaskkal Sámi allaskuvlla ja Riikkaidgaskasaš boazodoalloguovddáža (ICR), ja Rievdan dutkanprošeakta lei vuolggasadji konferánssa lágideamis.

Konferánssa ulbmil lei almmuhit ođđa dutkanbohtosiid Rievdanprošeavttas, lonohallat sihke dutkan- ja boazobargiidvásáhusaid. Seammás ráhkadit gulahallan- ja deaivvadanarena boazobargiide, dutkiide, politihkkáriidda ja studeanttaide.

- Oasseváldit lohke ahte lea dehálaš ahte dakkár arenaid ásahit ja ahte bohte garra ávžžuhusat oasseváldiin joatkit ráhkadit dakkár arenaid. Lea dehálaš maid ahte dutkanbohtosat gaskkustuvvojit boazodolliide, ja ledje ge eanas boazosápmelaččat geat serve konferánsii, muitala lágideaddji ovddasteaddji Inger Marie Gaup Eira

Seammás addá dutkanprošeakta vuođu ráhkadit ođđa mastergráda boazoealáhusa fágasuorggis.

- Dát leat dehálaš hukset ja nannet Boazoealáhusa máhtu Sámi allaskuvllas ja seanadit oarjemáilmmi máhtu. Dál fállá Sámi allaskuvla bachelorgráda Boazoealáhusas, ja dat boahtte lávki livčče fállagoahtit mastergráda boazoealáhusas. Dakkár prošeavttat addet dán vejolašvuođa, muitala Eira Gaup.

Rievdan-prošeavtta bohtosat

Bistevaš boazoealáhusláhki vásiha guohtuneatnamiid dáfus stuora rievdadusaid jođánis nuppástuhttimiid geažil nu go dálkkádatrievdamiid ja guohtoneatnamiid massimiid dáfus. Rievdan-dutkanprošeakta lea dutkan boazosápmelaččaid vejolašvuođaid heivehit dákkár rievdademiide geavahettiin sin iežaset boazodoallomáhtu.

Rievdan-prošeavttas, maid Norgga dutkanráđđi lea ruhtadan, lea fágaidrasttideaddji lahkoneapmi, mas leat dákkár bohtosat: 18 fágaguoibmeguorahallan dieđalaš artihkkala, 12 artihkkala girjjiin árbevirolaš máhtu suorggis, ja 33 kapihttalat riikkaidgaskasaš raporttaid. Fágaguoibmeguorahallan artihkkalat guovtti girjjis Springer Nature Polar ráiddus leat almmuheamis ja dasa lassin okta girji Árktalaš eamiálbmot biebmosystemaid fáttáin Dieđut-ráiddus

Loga Springer Nature Polar girjjii dáppe (liŋkka).

Geahča govaid konferánssa

Das vuolábealde lea govvaráidu. Govas lea njuolla maid sáhtát deaddilit go háliidat boahtte gova geahčat.

Boazodoallokonferánsa 2022