Rektoráhta dearvvuođat
(23.3.20 dii 1315)
Sávan ahte mannan vahkku lea mannan bures, ja ahte dii lehpet dearvašat. Mii buohkat geat bargat Sámi allaskuvllas, čuovvut dearvvašvuođaeiseválddiid dieđuid ja rávvagiid dávdda birra dađistaga go dilli rievdá. Mii doallat beaivválaš čoahkkimiid ja árvvoštallat čađat galgá go makkárge earenoamáš doaibmabijuid bidjat johtui omd. oahpahusa ektui.
Go bođii diehtu ahte studeanttat eai galgga fysalaččat čohkkejuvvot oahpahussii, de leat buot min oahpahusat sirdojuvvon nehttii. Dál lea Sámi allaskuvlla fágaoahpaheddjiin ovttasbargu vai sihkkarastit ahte fállojuvvon neahttaoahpahus lea lágiduvvon heivvolaš vugiin. Dasa mis lea veahkki sihke oahppohálddahusas, IT-ossodagas ja girjerádjosis.
Mii leat dál heiveheame min giđđaplána nu ahte mii leat gergosat joatkit doallat oahpahusa neahta bokte nu guhká go lea dárbbašlaš. Mii leat maid gergosat heivehit eksámeniid ja hárjehallamiid čađaheami.
Váldde oktavuođa fágaoahpaheddjiiguin, fágakoordináhtoriiguin dahje oahppohálddahusain jus leat gažaldagat. Sámi allaskuvlla bealis lea ipmárdus ahte dis lea hástaleaddji dilli. Jus dus leat jearaldagat oahpahusa birra dahje dárbbašat bagadallama, de váldde oktavuođa du fágaoahpaheddjiiguin. Muitte ahte mis lea maid ráđđeaddi gii sáhttá veahkehit jus dárbbašat ságastallat eará áššiid. Sus lea hárjáneapmi ságastallat olbmuiguin geat leat lossa dilis. Jus háliidat suinna hupmat, de gávnnat eanet dieđuid min neahttasiiddus.
Ellet dearvan ja muitte fal váldit oktavuođa jus leat gažaldagat, ja čuovo mielde dieđuid min neahttasiiddus!
Dearvvuođat Ylva Jannok Nutti, Sámi allaskuvlla prorektor