BA - Prográmma

JOU Sámi journalistihka bachelorprográmma

Šatta sámi journalistan!

FUOM! Oahppu ii álgge 2016 čavčča.

  • Bacheloroahppu- golbma jagi ollesáiggis
  • 180 oahppočuoggá
  • Sisaváldingáibádusat: Oppalaš lohkangelbbolašvuohta dahje reálagelbbolašvuohta ja sámegielladuogáš
  • Vejolašvuohta čiekŋudit álgoálbmotjournalistihkkii
     

Sisdoallu

Journalistaoahppu deattuha vuosttaš jagi ođas- ja kommentárajournalistihka ja sámi servodatdili. Seammás oahpat geavahit govvenapparáhtaid, báddenrusttegiid, videokameraid ja dárbbašlaš dihtorprográmmaid. Nuppi jagi deattuhuvvo reportášajournalistihkka ja álgoálbmotservodagat. Studeanttat čiekŋudit ovtta mediašládji, juogo aviisa-, rádio- dahje TV-buvttadeapmái. Seammás buohkat ohppet eambbo WEB-almmuheami. Journalistagiella ja mediadiehtu leat sierra fágat ja integrerejuvvon oassin journalistihka oahpus. Giellaoasis oahpat earret eará movt geavahit sámegiela journalisttalaš barggus. Mediadieđus lea sámi ja álgoálbmot mediadilli guovddážis. Oahppoáigodagat sisttisdollet maid bargohárjehallamiid mediain.
 

Čiekŋudanvejolašvuođat

Journalistihka bacheloroahppu bistá golbma jagi. Goalmmát jagi čiekŋudeamis lea dus vejolaš lohkat lasi journalistihka dahje sáhtát lohkat eará fágaid nu go ovdamearkka dihte sámegiela. Dus lea maid vejolašvuohta lohkat jahkebeali eará allaskuvllas dahje universitehtas. Bachelorgráda sáhttá leat journalistihka mastergrádai vuođđun.
 

Bargovejolašvuođat

Sámis leat ollu mediafitnodagat, ja Sámi allaskuvlla journalistaoahppu addá dutnje gelbbolašvuođa bargat journalistan sihke sámi ja riikka mediain. Don sáhtát maid álggahit iežat mediafitnodaga, mii vuovdá reportášaid iešguđetlágan mediaide. Oahppu addá maid dutnje vuođu bargat diehtojuohkkin almmolaš ásahusain dahje fitnodagain.


 

 

Sisabeassangáibádusat

  • Oppalaš lohkangelbbolašvuohta dahje reálagelbbolašvuohta ja sámegiella.
  • Sámegiela gáibádusa sáhttá deavdit čuovvovaš vugiid mielde: Sámegiella 1. dahje 2. giellan joatkkaskuvllas, Suoma bealde logahagas eatnigielladutkkus dahje guhkes amasgielladutkkus ja Ruoŧa bealde Modersmål A, B ja C dahje dušše A ja B.
  • Sámegiela gáibádusa sáhttá maid deavdit Sámegiella lohkanbadjeoahpuin 30 oč dahje vástideddjiin, dahje ceavzit sámegiela geahččaleami man Sámi allaskuvla lágida.