BA - Sierra kursa

DUO 105 Plánen, hutkáivuohta ja duddjon

Oahppu lea duoji bachelorprográmma geatnegahttojuvvon duodjefágalaš vuođđooahppu. Earátge sáhttet ohcat ohppui, ja oahppu sáhttá leat doarjjafágan dahje válljenfágan eará bachelorprográmmain dahje eará oahpuin.

Sisdoallu
Oahpus oahppá plánet, duddjot ja gaskkustit duoji. Oahppu fállá praktihkalaš ja teorehtalaš dieđu, mainna studeanta ovddida iežas hutkáivuođa ja viiddida iežas duodječehppodaga ja áddejumi. Oahpus ávkkástallat čuolmmaidčoavdinmetodaiguin, mat fállet studentii reaidduid plánemii, hábmemii ja duddjomii. Oahpus suokkardallat hutkáivuođa duddjonproseassas.

Oahpahusvuogit leat duddjonbargobájit, logaldallamat, joavkobarggut, hárjehusat, oahppanportofolio, bagadallamat ja seminárat. Oahpus lea bealli lágiduvvon oassi (duddjon, logaldallamat, bagadallamat, bargobájit, seminárat jna.) ja bealli iešheanalaš bargan (duddjon, lohkan, bargobihtáid čoavdin, reflekterema čállin jna.).

Sisabeassangáibádusat

Dábálaš sisabeassangáibádusat alitoahpahussii. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga/gymnása) dahje reálagelbbolašvuohta. Dasa lassin gáibiduvvo sámegielmáhttu.
Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje
ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.

Ohcci gii ii leat Duodje- ja hábmenbachelora prográmmastudeanta galgá sáddet sisa 8-10 gova iežas dujiin duodje- dahje dáidda- ja hábmenfágalaš gelbbolašvuođa duođaštussan. Jus ohccis lea fágabreava duojis, duodjeoahput duodjeskuvllas dahje eará vástideaddji
duodjeoahppu, de sáhttá sáddet sisa fágabreava dadje oahppoduođaštusa, ja oažžut dan dohkkehuvvot duodje- dahje dáidda- ja hábmenfágalaš gelbbolašvuođa duođaštussan.

Koordinator

ingaepi's picture
Idivuoma, Inga Elisa Påve
E-mail: 
Inga-Elisa-Pave.Idivuoma@samiskhs.no