Boazoealáhusa bachelorprográmma
Boazodoallooahpuid bachelora lea golmma jagi oahppu (180 oahppočuoggá) Sámi allaskuvllas mas don čiekŋudat fáttáide gusket boazodollui ja loahpaha oahpu bachelorbargguin ieš válljejuvvon fáttá vuođul.
Oahpus leat guovddážis čanastagat ja deaivvadeamit mat nuppebealde gullet Sámi árbevirolaš vuođđoealáhusaide, dás erenoamážit boazosiiddastallamii, ja nuppebealde riektevuođđu, riikkaid almmolaš hálddašeami huksen ja doaibmavuogit. Dain beliin leat iežaset árbevierut, vuođđomállet ja máhttovuogádagat.
Dát oahppu addá earenoamáš gelbbolašvuođa sámi vuolggasajis guorahallat davviriikkaid sámi guovlluid sullasašvuođaid ja erohusaid máhtuin, bargovugiin, vieruin ja birgenlágiin.
Dákkár gaskavuođain ja iešguđetlágánvuođain leat ollu buohtastahttinvejolašvuođat ja dáid diehtin ja guorahallan addá kandidáhtaide gelbbolašvuođa ovdanbuktit sámi servodaga dárbbuid hálddahuslaš vuogádagain.
Oahpahan- ja oahppanvuogit: Oahpus lea sihke fysalaš (Sámi allaskuvllas) ja neahttavuđot oahpahus.
Oahpahus- ja eksámengiella: Oahpahusa váldogiella lea davvisámegiella. Oasit oahpahusas sáhttet leat eŋgelasgillii ja davviriikkalaš gielaide. Oahpahus eaŋgalsgillii ii dulkojuvvo. Eará gielaid oahpahus dulkojuvvo dárbbu mielde. Eksámengiella lea davvisámegiella
Diibmoplána ja deaivvadanplána
- Sisabeassangáibádusat
- Dábálaš sisabeassangáibádusat alitohppui. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga/gymnása) dahje reálagelbbolašvuohta
Sámegielmáhttu.
Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.
- Oahpu oppalaš sisdoallu
Oahpus leat guovddážis čanastagat ja deaivvadeamit mat nuppebealde gullet Sámi árbevirolaš vuođđoealáhusaide, dás erenoamážit boazosiiddastallamii, ja nuppebealde riektevuođđu, riikkaid almmolaš hálddašeami huksen ja doaibmavuogit. Dain beliin leat iežaset árbevierut, vuođđomállet ja máhttovuogádagat.
Dát oahppu addá earenoamáš gelbbolašvuođa sámi vuolggasajis guorahallat davviriikkaid sámi guovlluid sullasašvuođaid ja erohusaid máhtuin, bargovugiin, vieruin ja birgenlágiin. Dákkár gaskavuođain ja iešguđetlágánvuođain leat ollu buohtastahttinvejolašvuođat ja dáid diehtin ja guorahallan addá kandidáhtaide gelbbolašvuođa ovdanbuktit sámi servodaga dárbbuid hálddahuslaš vuogádagain.
- Bargo- ja joatkkaoahppovejolašvuođat
Bachelorprográmma ollašuhttin addá gelbbolašvuođa dihto mastergrádaoahpuide juogo Sámi allaskuvlla dahkan soahpamušaid vuođul eará oahppoásahusaiguin dahje ohcama vuođul.
Oahppu addá gelbbolašvuođa bargguide mat hálddašit, doaimmahit, čielggadit dahje leat doarjjan ovdánahttit sámi ealáhusaid, ja das erenoamážit boazoealáhusa. Muđui bargguide mat gullet meahccebirrasa ja dasa gullevaš doaimmaid hálddašeapmái.
Dasa lassin eará bargguide maidda gullá seailluhit, oahpásmahttit dahje ovdanbuktit sámi dieđuid, máhtuid ja bargovugiid das mii gullá sámi ealáhus- ja birgenlágiide obalohkái.
Viidáset oahppu addá vuođu dovdat boazoealáhusa ekonomiija ollislašvuođadiliid ja daid ođasmahttima beliid, ja dasa lassin maiddái diehtovuođu árvvoštallat ealáhusa bistevašvuođa.
Prográmmaplána Boazoealáhusa bachelor 180 oahppočuoggá
Áigemearit ja dehálaš dáhtonat čavčča oahpuide
Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no