BA - Prográmma

BOA Boazodoallooahpuid bachelorprográmma

  • Oahpahusgiella: Sámegiella
  • Oahpahusbáiki: Sámi allaskuvllas
  • Bacheloroahppu – ollesáigeoahppu 3 jagi
  • 180 oahppočuoggá
  • Oahppoprográmmaplána dohkkehuvvon DOS 49/13, 31.05.13

Gelddolaš oahppu mas boazodoallu lea guovddážis ja ráhkkanahttá du dustet hástalusaid!

Sisdoallu
Boazodoallooahpuid bachelora lea golmma jagi oahppu (180 oahppočuoggá) Sámi allaskuvllas mas don čiekŋudat fáttáide mat leat guoskevaččat boazodollui ja loahpaha oahpu bachelorbargguin ieš válljejuvvon fáttá vuođul. 

Oahpus oahpasnuvat dieđalaš bargo- ja ovdanbuktinvugiide, ja maiddái movt árbevirolaš sámi boazobargo- ja siiddastallanmáhttu lea nubbi máhttovuogádat ja geahčastanvuohki. Oahppu maid addá vejolašvuođa čiekŋudit iešguđet fágasurggiide. Go gearggat oahpuin dus lea gelbbolašvuohta nuppi bealis sámi boazobargovugiid, ealáhuslágiid ja siiddastallama birra, ja nuppi bealis almmolaš boazodoallohálddašeami, eiseválddi stivrema ja eará olggobeali doaimmaid birra. 
 

1. lohkanbajis studeanta oahpásnuvvá dieđalaš čállinvugiide, eamiálbmotfilosofiijai ja muđui dutkanmetodaide, golmmá bákkolaš oahppoovttadagain bacheloroahpus (juohke oahpus lea 10 oahppočuoggá)

2. lohkanbajis leat guokte oahppoovttadaga; "Boazu, bohcco ávkin ja birgejupmin" (20 oahppočuoggá) ja vuosttaš oassi oahpus "Guohtun, guohtumuš ja guođoheapmi" mas namma “Guohtunšattut ja guohtuma máhttu" (10 oahppočuoggá).

3. lohkanbajis joatká nubbi oassi oahpus "Guohtun, guohtumuš ja guođoheapmi"; namalassii “Eatnamiid ja guođoheami máhttu” (10 oahppočuoggá) ja dasto vel "Siiddastallan ja boazodoalu hálddašeapmi" (20 oahppočuggá). 

4. lohkanbajis leat guokte oahpu "Boazodoallorievtti vuođđooahppu" (10 oahppočuoggá) ja "Boazodoalu lágat ja riekteipmárdusat" (20 oahppočuoggá). 

5. lohkanbajis don válljet ieš makkár fágaid háliidat čatnat bachelorohppui (sáhttá ohcat fágaid dohkkehuvvot maid eará oahpuin dahje eará oahppoásahusain lea lohkan).

6. lohkanbajis čálát vel bachelorbarggu. 


Čiekŋudanvejolašvuođat
Bacheloroahppu kvalifisere dihto masteroahpuide ja maiddái boazodoallomasterohppui mii lea plánema vuolde Sámi allaskuvllas. 

Bargovejolašvuođat
Oahppu addá gelbbolašvuođa bargat máŋggalágan almmolaš ja priváhta surggiin. Oahppoprográmma čađaheami maŋŋá sáhtát bargat earret eará iešguđet hálddahussurggiin gos dárbbašuvvo boazodoallomáhttu, meahccehálddašanmáhttu, servodatmáhttu dahje sámi dahje eamiálbmotperspektiiva. Sáhtát maid bargat boazodoallobagadallin, guorahallin ja áššedovdin, kulturbargin, boazodoalloorohagaide/stivrraide čállin,  ja maiddái dutkin ja eará bargguin. Oppalaččat oahppu lea ávkkálaš jus áiggut bargat birrasiin gos boazodoalloáššit gieđahallojit ja meannuduvvojit ja maiddái sámi dieđalaš ja akademalaš birrasis. Jus Norggas lohká lassin praktihkalaš pedagogalaš oahpu (PPO), de dat addá gelbbolašvuođa oahpahit boazodoallofága vuođđoskuvllas ja joatkkaskuvllas.

Prográmmaplána boazodoalu bachelorai
Filesize: 552 KB

Sisabeassangáibádusat

  • Oppalaš lohkangelbbolašvuohta dahje reálagelbbolašvuohta ja sámegiellamáhttu.
  • Sámegiela gáibádusa sáhttá deavdit čuovvovaš vugiid mielde: Sámegiella 1. dahje 2.giellan joatkkaskuvllas, Suoma bealde logahaga eatnigielladutkkus dahje guhkes amasgielladutkkus ja Ruoŧa bealde ges Modersmål A, B ja C dahje dušše A ja B. Sámegielagáibádusa sáhttá maid deavdit Davvisámegiela lohkanbadjeoahpuin 30 oč dahje vástideddjiin, dahje ceavzit sámegiela geahččaleami man Sámi allaskuvla lágida.

Koordinator

mikkelns's picture
Sara, Mikkel Nils M
Phone: 
+4778448464
E-mail: 
Mikkel-Nils-Mikkelsen.Sara@samiskhs.no