BA - Jahkeovttadat

OAP Geabbilis praktihkalaš pedagogalaš oahppu fidnofágaid ja dábálaš fágaid váste

  • 60 oahppočuoggá (30 oč pedagogihkka + 30 oč fidno-/fágadidaktihkka)
  • Oahpu lágideapmi: Geabbilis ollesáiggeoahppu guovtti lohkanbaji badjel,  mas leat sihke digitálaoahpahus, deaivvadeamit Sámi allaskuvllas ja pedagogalaš hárjehallamat skuvllas, fitnodagain ja allaskuvllas. Oahppu geavaha oahpahusmodealla máŋggabealat oahppama ("blended learning"), suokkardalli oahppama ja eará oahppanvugiid mat dorjot geabbilis ja studeanta aktiivva bargovugiid.
  • 12 vahku pedagogalaš/ praktihkalaš hárjehallan
  • Oahpahusgiella: Sámegiella. Logaldallamat sáhttet maid leat skandinávalaš- dahje eŋgelasgillii.
  • Oahpu álgin lea 15.08.18, dii. 09.00
  • Fágaplána
  • Lohkanbadjeplána

Bargovejolašvuođat
Leat go don lohkan fágaid mat oahpahuvvojit skuvllas? Háliidivččet go oahpaheaddjevirggi, muhto váilu pedagogalaš gelbbolašvuohta? Praktihkalaš pedagogalaš oahppu (PPO) addá oahpahangelbbolašvuođa dan fágasuorggis, mas leat ovdal váldán alit oahpu. Geahča gáibádusaid virgáibidjamii ja oahpaheapmái láhkaásahusas.

Sámi allaskuvla fállá 2018 čavčča geabbilis praktihkalaš-pedagogalaš oahpu. Eaktun lea ahte gártá studeantajoavku doarvái stuora joavku ja ahte gávdnat siskkáldas resurssaid ja doarvái hárjehallanbáikkiid.

Sisdoallu

Oahpu sisdoalu vuolggasadjin lea sámi ipmárdus- ja máhttovuođđu, masa gullá maid sámiid oahppan- ja oahpahanipmárdus. Maŋŋel go dán oahpu leat gazzan, don šattat boahtteáiggi sámi oahpaheaddjin guhte nákcet doaibmat goit guovtti máhttomáilmmis, ja don máhtát lunddolaččat atnit sihke árbevirolaš máhtu ja dieđalaš máhtu oahpahandilálašvuođain. Go dán oahpu leat čađahan, de dus lea oahpaheaddjemáhtu gos sáhtát viežžat dieđuid iešguđetge fágasurggiin, omd. árbevirolaš máhtus, dieđalaš máhtus, pedagogalaš máhtus ja digitálagelbbolašvuođas. Dus leat bargovuogit praktihkalaš, pedagogalaš barggus mat dárbbahuvvojit ođđaáigásaš servodagas mii jođánit rievdá. Don oaččut ovdánahttinmáhtu ja máhtu oahpahusa- ja oahpahanmálliid viidudit nu ahte nákcet dustet boahtteáiggi ođđa dilálašvuođaid ja hástalusaid mat leat áigeguovdilat.

Oahppu lea lágiduvvon geabbilisvuogi mielde, mas studeanttas lea vejolašvuohta bargat goas ja gos ieš áigu ja mii maiddái addá vejolašvuođa bargat ja oahppat fierpmádagain ja ovdánahttit máhtu ovttas earáigui.

Oahppanteoriijain ja bargohárjehallamiin oahpat plánet, čađahit ja árvvoštallat oahpahusa.

Stipeandavejolašvuođat
Iskka Sámedikki stipeandaortnegiid ja Oahpahusdirektoráhta ortnegiid skuvlaeaiggádiidda.

Fuomáš!

  • Jus dus ii leat čiekŋudeapmi sámegielas, ii ge boazodoalus, de galggat dušše válljet juoppá oahpuin "Praktihkalaš pedagogalaš oahppu- sámegiella" dahje "Praktihkalaš pedagogalaš oahppu- boazodoallu", go ozat ohppui min elektrovnnalaš ohcanvuogádaga bokte, "Søknadswebas".

 

Filesize: 633 KB
Filesize: 637 KB

Sisabeassangáibádusat

Sisabeassaneaktun lea okta dain oahppoduogážiin:

  • Golmma jahkásaš universitehta- dahje allaskuvlaoahppu ja unnimus 60 oahppočuoggá fágačiekŋudeapmi juogo sámegielas dahje boazodoalus.
  • Golmma jahkásaš universitehta- dahje allaskuvlaoahppu, mas leat 60 oahppočuoggá fágačiekŋudeapmi eará surggiin, ja mas deattuhuvvo unnimus guokte jagi ámmáhii relevánta práksis, mas njálmmálaš sámegiella lea adnon oahpahangiellan.
  • Golmma jahkásaš profešuvdnavuđut bachelorgráda ja unnimus guokte jagi ámmáhii relevánta práksis.
  • Fága-/ svennereive dahje eará golmma jahkásaš fidnooahppu joatkkaskuvladásis, dábálaš oahppogelbbolašvuohta, guokte jagi relevánta fidnoteorehtalaš oahppu joatkkaskuvlla maŋŋá ja njeallje jagi fidnopráksis.
  • Sámegiellamáhttu. Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.

Muđui čujuhit universitehtaid ja allaskuvllaid oktasaš sisaváldinnjuolggadusaide 
Forskrift om opptak til høyere utdanning.
Kápihttal 6 vuođul gáibiduvvo politiijaduođaštus oahpuin gos studeanttat leat oktavuođas mánáidgárdemánáiguin ja ohppiiguin dahje earáiguin oassin hárjehallamis.

Koordinator

mathisb's picture
Bongo, Mathis Persen
Phone: 
Mobile: 
E-mail: 
Mathis-Persen.Bongo@samiskhs.no

Studenten

Olles PPO-oahppu ja measta visot lohkanmearri lea sámegillii. Beassat hárjehallamii gos oaidnit movt oahpaheaddji bargu lea.
Portrettbilde av Inger Márjá Nilut
Inger Márjá Nilut